ԵՐԵՎԱՆ, 26 դեկտեմբերի - Sputnik. Մոսկվայում կվերանորոգեն «Արմեն Ջիգարխանյանի պրոգրես-բեմ» թատրոնի շենքը։ Այս մասին հայտնում է Ռուսաստանի մայրաքաղաքի քաղաքապետի պաշտոնական կայքը։
«Կվերանորոգվի «Արմեն Ջիգարխանյանի պրոգրես-բեմ» թատրոնի շենքը։ Նախագիծն արդեն համաձայնեցված է»,-ասված է հաղորդագրության մեջ։
Նախատեսվում է, մասնավորապես, թատրոնի շենքի ճարտարապետական լուսավորության ստեղծում ինչպես գլխավոր ճակատին, այնպես էլ հետնամուտքի կողմից։
«Մոսկոմէքսպերտիզայի» նախագահ Աննա Յակովլևան նշել է, որ ճակատային պատերը կմաքրեն` վերադարձնելով աղյուսի պատմական գույնը, այնուհետև կպատեն ջրակայուն շերտ առաջացնող նյութերով։
Կվերականգնվեն նաև բացակայող դեկորատիվ ներդիրները և գետնահարկի երեսպատումը կաթնա-շագանակագույն փայլեցված գրանիտե սալիկներով։
Օդափոխության խողովակներին նոր դեկորատիվ վանդակաճաղեր կտեղադրվեն` ուղղահայաց ձողերի տեսքով։
Յակովլևայի խոսքով` այս ամենը թույլ կտա բարելավել ու ընդգծել շենքի արտաքին տեսքը։