ԵՐԵՎԱՆ, 26 դեկտեմբերի - Sputnik. Հայաստանը չի բոյկոտել Մոսկվայում կայանալիք Ռուսաստանի և Ադրբեջանի արտաքին գործերի նախարարների հանդիպումը։ Այս մասին Հանրային հեռուստաընկերությանը տված հարցազրույցում ասաց անվտանգության խորհրդի քարտուղար Արմեն Գրիգորյանը։
«Մենք չենք գնացել, որովհետև Լաչինում ճգնաժամ է ստեղծվել։ Այսօր լայնածավալ աշխատանքի անհրաժեշտություն կա, որպեսզի այդ հատվածն արագ բացվի։ Ամբողջ մեր քաղաքական թիմը և արտաքին քաղաքականության համար հատուկ պատասխանատուները զբաղվում են այդ հարցը հանգուցալուծելով։ Մենք գնահատել ենք իրավիճակն ու հասկացել ենք, որ լավագույն տարբերակը սա է մեր քայլերը կոորդինացնելու համար»,– նշեց Գրիգորյանը։
Նա ընդգծեց, որ հայկական կողմը միշտ էլ կառուցողական է եղել, նաև վերջին երկու տարում` պատերազմից հետո շարունակվող բանակցություններում։
Նկատառմանը, թե այդ քայլի պատճառով ստեղծվում է նաև դիվանագիտական ճգնաժամ Հայաստանի ու Ռուսաստանի միջև, ԱԽ քարտուղարը վստահեցրեց` ՀՀ–ն ընդհանրապես այդպիսի քայլ չի արել, որպեսզի նման ճգնաժամ ստեղծվի։
Հիշեցնենք, որ դեկտեմբերի 22-ին ՀՀ ԱԳ նախարարությունը հայտարարություն էր տարածել, որ Արարատ Միրզոյանը չի մեկնի դեկտեմբերի 23-ին Մոսկվայում կայանալիք Հայաստանի, Ռուսաստանի և Ադրբեջանի արտգործնախարարների հանդիմանը։ Նշվել էր, որ այս պահին առաջնահերթությունը Լաչինի միջանցքի անխոչընդոտ վերագործարկումն է։