ԵՐԵՎԱՆ, 25 դեկտեմբերի – Sputnik. Օրեր առաջ Փարիզում տեղի ունեցած հրաձգության համար ձերբակալված տղամարդը, որի հետևանքով զոհվել էին քրդական համայնքի երեք ներկայացուցիչներ, նույն օրն ավելի վաղ ուղևորվել էր Ֆրանսիայի մայրաքաղաքից հյուսիս գտնվող Սեն Դենի համայնք, որտեղ ծրագրել էր սպանել օտարերկրացիներին: Այս մասին հայտնում է France Presse-ը՝ հղում անելով Փարիզի դատախազությանը։
«Ձերբակալվածը սկզբում գնացել է Սեն Դենի, որպեսզի սպանի օտարերկրյա քաղաքացիների, սակայն չի կատարել հանցագործությունը, քանի որ շուրջբոլորը քիչ մարդ է եղել։ Պատճառներից մեկն էլ եղել է այն, որ նրա հագուստը խանգարել է անարգել լիցքավորել զենքը», - հայտնել Է Փարիզի դատախազ Լորա Բեկկոն։
Հոգեբուժարան տեղափոխված հանցագործը քննության ժամանակ խոստովանել է, որ ատել է օտարերկրացիներին, ու դա նրա մոտ դարձել է պաթոլոգիական:
Նա նաև խոստովանել է, որ դեպրեսիվ է ու ինքնասպանության հակումներ ունի, իսկ միգրանտներին սպանելու ցանկություն է ունեցել 2016 թվականից սկսած:
Հիշեցնենք, որ դեկտեմբերի 23-ին 69-ամյա տղամարդը կրակ էր բացել Փարիզի փողոցներից մեկում ՝ քրդերի մշակութային կենտրոնի մոտակայքում։ Հրաձգության հետևանքով մահացել էր երեք մարդ։ Վերջին տվյալներով՝ տուժածներից երկուսի վիճակը գնահատվում է ծայրահեղ ծանր, ևս երկուսինը՝ միջին ծանրության: