ԵՐԵՎԱՆ, 25 դեկտեմբերի – Sputnik. Մի շարք միջազգային հասարակական կազմակերպություններ Աֆղանստանում դադարեցրել են իրենց գործունեությունն այն բանից հետո, երբ թալիբները («Թալիբան» շարժումն ահաբեկչական գործունեության համար գտնվում է ՄԱԿ–ի պատժամիջոցների ներքո) որոշել են արգելել իգական սեռի ներկայացուցիչներին աշխատել տեղի և միջազգային ՀԿ–ներում։
Նախօրեին թալիբները բոլոր տեղական և միջազգային հասարակական կազմակերպություններին հրահանգել են Աֆղանստանում դադարեցնել իգական սեռի ներկայացուցիչների աշխատանքը «մինչ հետագա ծանուցումը»։
Երեկ իրենց գործունեությունը դադարեցնելու մասին են հայտնել Save the children, «Փախստականների գործերով նորվեգական խորհուրդ» (NRC) և CARE կազմակերպությունները։ Նրանք նաև դատապարտել են թալիբների որոշումն ու հայտարարել, որ չեն կարող արդյունավետ կատարել իրենց աշխատանքը առանց իգական սեռի ներկայացուցիչների։
«Մենք դադարեցնում ենք մեր ծրագրերն ու պահանջում, որ տղամարդիկ և կանայք կարողանան հավասար հիմունքներով շարունակել աջակցել մեզ Աֆղանստանում կյանքերի պահպանման գործում», – ասվում է ՀԿ–ների համատեղ հայտարարության մեջ։
Ավելի վաղ աֆղանական ԶԼՄ–ները հայտնել էին, որ թալիբների կառավարության բարձրագույն կրթության նախարարությունը կարգադրել է Աֆղանստանի մասնավոր և պետական բուհերում արգելել ուսանողուհիների ուսումնառությունը։ Աֆղանստանի բարձրագույն կրթության նախարարը հայտարարել էր, որ աշխարհիկ բուհերում աղջիկների ուսուցումը խախտում է իսլամի օրենքներն ու հակասում իսլամական ավանդույթներին։