ԵՐԵՎԱՆ, 24 դեկտեմբերի – Sputnik. Հայաստանի հավաքականի գլխավոր մարզչի պաշտոնակատար Ռոման Բերեզովսկին Metaratings.ru-ին տված հարցազրույցում խոսել է Եվրո-2024-ի ընտրական փուլում ազգային հավաքականի հեռանկարների մասին։
Բերեզովսկին նշել է, որ Հայաստանի հավաքականում շատ երիտասարդներ են հայտնվել, ու կարևոր է, որ միջազգային հանդիպումներում արագ հաղթահարեն դժվարությունները, փորձ ձեռք բերեն։
«Եթե երիտասարդ սերնդի ձևավորման գործընթացը տեղի ունենա արդյունքի հետ միաժամանակ, ապա հիանալի կլինի։ Այնպես, ինչպես հեքիաթում։ Մեզ համար հիմա գլխավոր խնդիրը ժամանակակից ֆուտբոլին հարմարվելն է, իմ կարծիքը սա է»,– ասել է Հայաստանի հավաքականի նախկին դարպասապահը։
Նրա խոսքով`դժվար է Հայաստանի հավաքականին անվանել խմբի ֆավորիտ, քանի որ կան ավելի հայտնի և փորձառու թիմեր։
«Հենց խաղերը սկսվեն, կլինեն և՛ ֆավորիտներ, և՛ հետնապահներ։ Մենք բուքմեյքերներ չենք, որ գնահատենք գործակիցները»,- հավելել է Բերեզովսկին։
Նշենք, որ Ռոման Բերեզովսկին մարզչական կարիերան սկսել է 2020 թվականի հուլիսին՝ դառնալով Հայաստանի հավաքականի դարպասապահների մարզիչ, ապա Խոակին Կապառոսի հեռանալուց հետո, 2022 թվականի նոյեմբերի 8-ին նշանակվել է ազգային հավաքականի գլխավոր մարզչի ժամանակավոր պաշտոնակատար։