ԵՐԵՎԱՆ, 22 դեկտեմբերի – Sputnik. Լաչինի միջանցքը բացելու համար Ադրբեջանի կողմից Հայաստանի իշխանության առաջ որևէ պահանջ չի դրվել։ Կառավարության նիստից հետո լրագրողների հետ զրույցում ասաց ՀՀ արտակարգ իրավիճակների նախարար Արմեն Փամբուխչյանը։
«Մենք այս գործընթացին միջազգային մեծ հնչեղություն ենք տվել ու հետևողականորեն գնալու ենք նրան, որ Ադրբեջանը բացի Լաչինի միջանցքը, և 120 հազար մեր հայրենակիցները դուրս գան շրջափակումից», - ասաց նախարարը։
Նա նշեց, որ Լաչինի միջանցքում Արցախի ներքին գործերի նախարարության հերթապահող անցակետեր կան։
ԱԻ նախարարի խոսքով` Լաչինի միջանցքի փակ լինելու հետևանքով մնացել են Գորիսում մնացած քաղաքացիներին պատշաճ կերպով ցուցաբերվում է օգնություն։
Փամբուխչյանը վստահեցրեց՝ ամենօրյա ռեժիմով կապի մեջ է Արցախի գործընկերոջ հետ։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։