ԵՐԵՎԱՆ, 21 դեկտեմբերի – Sputnik․ Այսօր ՀՀ-ում հավատարմագրված օտարերկրյա դեսպանությունների ռազմական կցորդներն այցելել են ՀՀ պաշտպանության նախարարությունը։ Տեղեկությունը հայտնում է ՊՆ մամուլի ծառայությունը։ Նշվում է, որ նրանց հետ հանդիպել է ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը։
Դեսպանությունների ռազմական կցորդներն այցելել են ՀՀ պաշտպանության նախարարություն
© Photo : official site of MoD of RA
«Տարեվերջյան ամփոփիչ հանդիպման ընթացքում ամփոփվել են ընթացիկ տարում իրականացրած աշխատանքները, հյուրերին ներկայացվել է բրիֆինգ ՀՀ անվտանգային միջավայրի և պաշտպանության ոլորտում իրականացվող բարեփոխումների վերաբերյալ»,- նշված է հաղորդագրության մեջ։
Հանդիպման ընթացքում ընդգծվել է, որ գալիք տարի ակնկալվում է առավել դինամիկ համագործակցություն ռազմադիվանագիտական ոլորտում։
Նշենք, որ վերջին անգամ Հայաստանում հավատարմագրված օտարերկրյա դեսպանությունների ռազմական կցորդները ՀՀ պաշտպանական գերատեսչություն էին այցելել սեպտեմբերի 13-ին։ ՊՆ վարչական համալիրում ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը և ԶՈւ ԳՇ օպերատիվ գլխավոր վարչության պետի տեղակալ, գնդապետ Ալբերտ Բաղդադյանը ներկայացրել էին մանրամասներ ադրբեջանական ռազմական ագրեսիայի մասին։