ԵՐԵՎԱՆ, 21 դեկտեմբերի – Sputnik. Բոլոր հարցերի լուծման լավագույն տարբերակը սեղանի շուրջն անցկացվող բանակցություններն են: Ինչպես հայտնում է «Արմենպրես» գործակալությունը, լրագրողների հետ զրույցում այս հայտարարությունն արել է Հայաստանում Իրանի Իսլամական Հանրապետության դեսպան Աբբաս Բադախշան Զոհուրին:
«Իրանը միշտ ներկայացրել է իր դիրքորոշումը Կովկասի տարածաշրջանի իրադարձությունների վերաբերյալ, և դրանք միշտ եղել են հստակ: Իրանի ուշադրության կենտրոնում միշտ եղել է տարածքային ամբողջականությունը և հարգանքը միջազգայնորեն ճանաչված սահմանների նկատմամբ: Բազմիցս նշվել է և շեշտադրվել է հումանիտար հարցերի կարևորությունը Լաչինի միջանցքի հետ կապված խնդիրների առնչությամբ»,- ասել է նա։
Դեսպանի խոսքով՝ տարածաշրջանում հումանիտար հարցերը պետք է լինեն առաջնային։
«Այդ դեպքում է միայն ուշադրություն դարձվում հումանիտար հարցերին, և բնակչության առողջության հարցը կարևոր տեղ է գրավում»,- նշել է դիվանագետը։
Զոհուրին հույս է հայտնել, որ իրավիճակը հնարավորինս շուտ կկարգավորվի։
Հիշեցնենք, որ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Մարդիկ զրկված էին ջեռուցումից, տաք ջրից, բուժհաստատությունները չէին կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել էր դասապրոցեսը։
Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։
Երեկ` դեկտեմբերի 20–ին, ՄԱԿ–ի ԱԽ–ն Հայաստանի խնդրանքով նիստ անցկացրեց Ադրբեջանի հետ Հայաստանի սահմանին և Լաչինի միջանցքի շուրջ ստեղծված իրավիճակի վերաբերյալ։