ԵՐԵՎԱՆ, 20 դեկտեմբերի - Sputnik. Միլանի «Ինտերի» կիսապաշտպան, Հայաստանի հավաքականի նախկին ավագ Հենրիխ Մխիթարյանի մայրը` Մարինա Թաշչյանը մեկնաբանել է իր որդու հնարավոր վերադարձը Հայաստանի ֆուտբոլի ազգային հավաքական։
«Կուզենա վերադառնալ՝ թող վերադառնա, չի ուզենա` դա իր որոշումն է։ Հենրիխն ինքն է իր որոշումներն ընդունում, ես իր որոշումների մեջ ոչ մի լումա չունեմ, ինքն արդեն մեծ, հասուն մարդ է, ինքը որոշում է։ Ինքը հրաժարական տվեց իր իսկ որոշմամբ, հիմա ես ո՛չ խառնվել եմ, ո՛չ էլ, հիմա էլ էլի ասում եմ՝ ինքն իր որոշումն ունի։ Իսկ կվերադառնա, թե չէ՝ չեմ կարող ասել։ Բայց կարծում եմ՝ դժվար»,– ասել է Մարինա Թաշչյանը «Հրապարակ» օրաթերթի հետ զրույցում։
ՀՖՖ նախագահ Արմեն Մելիքբեկյանի հրաժարականի պահանջի հետ կապված հարցերին Մարինա Թաշչյանը, որն ի դեպ, երկար տարիներ աշխատել է ՀՖՖ-ում, հրաժարվել է պատասխանել, միայն նշել է, որ իր ասելիքն ասել է դեռևս երեք տարի առաջ։
«Եթե այն ժամանակ բոլորը լռել են, դա իմ մեղքը չի եղել, հիմա նոր բարձրաձայնում են դրա մասին։ Թող երեք տարի առաջ խոսեին, հիմա արդեն ուշ է։ Ես հիմա ո՛չ ֆեդերացիայի աշխատող եմ, ո՛չ ֆուտբոլի հետ ինչ-որ առնչություն ունեմ, որ ինչ-որ բան ասեմ կամ իմ մտքերն արտահայտեմ։ Ես, ճիշտն ասած, էստեղ էլ չեմ լինում մեծ մասամբ ու դրա համար ոչ մի բան չունեմ ասելու, ասելիքը թող ասեն ֆուտբոլային ակումբների նախագահները, ֆուտբոլային աշխարհը»,– ասել է նա։
Հիշեցնեն, որ օրեր առաջ «Փյունիկ» ֆուտբոլային ակումբի սեփականատեր Արթուր Սողոմոնյանն ակումբի պաշտոնական կայքին տված հարցազրույցում պահանջել է ՀՖՖ նախագահի հրաժարականը՝ խոսելով կառույցում ֆինանսական անարդյունավետ ծախսերի, խնդիրների մասին։ Վերջում էլ ներողություն է խնդրել ՀՖՖ գործկոմի նախկին անդամ Մարինա Թաշչյանից (Հենրիխ Մխիթարյանի մայրը)։ Սողոմոնյանը նշել է, որ նա միակ մարդն է եղել, որ 2019 թ.–ին դեմ է արտահայտվել Արմեն Մելիքբեկյանի՝ կեղծիքով ֆեդերացիայի նախագահ ընտրվելուն, ինչի համար էլ նրան հեռացրել են գործկոմից։
Այս հարցազրույցից հետո ՀՖՖ–ն հայտարարեց, որ պատրաստվում է դատի տալ Արթուր Սողոմոնյանին ու պարտադրել հրապարակային ներողություն խնդրել զրպարտության և կեղծիքի համար։