Գերիների հարցը ուշադրության կենտրոնում է. Փաշինյանը ԱԱԾ–ում մասնակցել է հանդիսավոր նիստին

Արմեն Աբազյանն ու Նիկոլ Փաշինյանը
Արմեն Աբազյանը հավաստիացրել է, որ ԱԱԾ–ն տիրապետում է երկրում տիրող օպերատիվ իրավիճակին։
Sputnik
ԵՐԵՎԱՆ, 20 դեկտեմբերի – Sputnik. ՀՀ ազգային անվտանգության ծառայությունում Հայաստանի անվտանգության մարմինների աշխատողի օրվա կապակցությամբ հանդիսավոր նիստ է տեղի ունեցել, որին մասնակցել է նաև ՀՀ վարչապետ Նիկոլ Փաշինյանը։ Տեղեկությունը հայտնում է ՀՀ ԱԱԾ մամուլի ծառայությունը։
ԱԱԾ տնօրեն, գեներալ-մայոր Արմեն Աբազյանն իր ելույթում շնորհավորել է ազգային անվտանգության մարմինների աշխատակիցներին և ներկայացրել 2022 թվականի ընթացքում կատարած աշխատանքի առավել նշանակալի արդյունքները։
«Աշխարհաքաղաքական ներկայիս դիմակայության և մեր տարածաշրջանում ծավալվող զարգացումների ժամանակ ԱԱԾ–ն իր առջև խնդիրներ է դրել։ Դրանց իրագործման ընթացքում ՀՀ ազգային անվտանգության արտաքին սպառնալիքների տիրույթում նոր զարգացումներ, վտանգներ և դրանց տարատեսակ դրսևորումներ են արձանագրվել են։ Այդ սպառնալիքների ժամանակին բացահայտման, գնահատման, հակազդման և չեզոքացման ուղղությամբ ծառայությունը ձեռնարկել է անհրաժեշտ քայլեր», - ասել է Աբազյանը:
ԱԱԾ տնօրենը նաև նշել է, որ հատուկ ուշադրության կենտրոնում է պահվում 2022 թվականի ընթացքում «Գերիների, պատանդների և անհայտ կորած անձանց հարցերով» միջգերատեսչական հանձնաժողովի աշխատանքների համակարգումը, քանի որ այն փոխանցվել է ԱԱԾ–ին։ Այժմ ձևավորվել է նոր հանձնաժողով և դրան կից աշխատանքային խումբ: Աբազյանը շեշտել է, որ հանձնաժողովն արդեն հրավիրել է նիստեր, կազմակերպվել են մի շարք հանդիպումներ գերեվարված և անհայտ կորած անձանց ծնողների հետ, որի ընթացքում քննարկվել են վերջիններիս կողմից բարձրացված հարցերը։ Արդյունքում հանձնաժողովի անդամներին տրվել են կոնկրետ հանձնարարականներ։
Արմեն Աբազյան
Ամփոփելով 2022թ․ ընթացքում Ազգային անվտանգության մարմինների հիմնական ստորաբաժանումների կողմից կատարված աշխատանքները՝ Աբազյանը փաստել է, որ դեռևս առկա են բազմաթիվ չլուծված խնդիրներ, որոնց ուղղությամբ ԱԱԾ-ն ամենօրյա աշխատանքներ է տանում։
Աբազյանը նաև հավաստիացրել է, որ ԱԱԾ–ն տիրապետում է երկրում տիրող օպերատիվ իրավիճակին և հետևողական շարունակելու է ապահովել անձի, հասարակության և պետության անվտանգությունը, երկրի տարածքային ամբողջականությունը, ինքնիշխանությունը, սահմանադրական կարգը, տնտեսության բնականոն զարգացումը, ինչպես նաև չեզոքացնելու է պետության ներքին և արտաքին անվտանգության սպառնալիքները:
Նիկոլ Փաշինյանն էլ բարձր գնահատելով Ազգային անվտանգության ծառայության աշխատանքն ու նվիրվածությունը` նշել է, որ ԱԱԾ–ն այն մարմինն է, որի աշխատանքի ծավալը և արդյունավետությունը ոչ բոլորին է տեսանելի և տեղեկատվությունը հասանելի և դա ծառայության առանձնահատկություններից է։
«Ազգային անվտանգության ծառայությունը մեր պետության կարևորագույն հիմնասյուներից է, որը պարտավոր է լինել ամենապետականամետը։ Քանի դեռ մեր երկրի անվտանգության բոլոր մարտահրավերները հասցեագրված չեն՝ դա նշանակում է, որ մեր բոլորի աշխատանքը բավարար չափով արդյունավետ չեմ կարող համարել, որովհետև առնչվում ենք ոչ սովորական մարտահրավերների»,– ասել է Փաշինյանը:
Մասնագիտական տոնի առթիվ վարչապետի կողմից ԱԱԾ մի շարք աշխատակիցներ ծառայողական պարտականությունները կատարելիս ցուցաբերած խիզախության և նվիրումի համար արժանացել են պետական պարգևների, շնորհակալագրերի և հուշամեդալների:
ՀՀ ԱԱԾ տնօրենը, տեղակալները, դեպարտամենտի ղեկավարները և ՀՀ ԱԱԾ սահմանապահ զորքերի հրամանատարը հարգանքի տուրք են մատուցել և ծաղիկներ խոնարհել հայրենիքի հանդեպ իրենց պարտքը կատարելիս զոհված և հերոսացած սահմանապահների հիշատակին կանգնեցված խաչքար-հուշակոթողներին:
ՀՀ ԱԱԾ տնօրենը, տեղակալները, դեպարտամենտի ղեկավարները և ՀՀ ԱԱԾ սահմանապահ զորքերի հրամանատարը հարգանքի տուրք են մատուցել հայրենիքի հանդեպ իրենց պարտքը կատարելիս զոհված և հերոսացած սահմանապահների հիշատակին կանգնեցված խաչքար-հուշակոթողներին