ԵՐԵՎԱՆ, 18 դեկտեմբերի –Sputnik. Բոլոր փոփոխությունները, որոնք այժմ տեղի են ունենում Ռուսաստանում և աշխարհում, դեպի լավն են տանում, ՌԴ-ն իր գործողություններով կկարողանա աշխարհն ավելի արդար դարձնել, այնտեղ բոլոր ժողովուրդները հավասար կլինեն։ Այս մասին ասել է ՌԴ նախագահ Վլադիմիր Պուտինը՝ երեխաների և երիտասարդների ռուսական շարժման առաջին համագումարի մասնակիցներին ուղղված տեսաուղերձում։
«Դուք հավանաբար գիտեք, որ այժմ մեծ փոփոխություններ են տեղի ունենում ոչ միայն Ռուսաստանում։ Ամբողջ աշխարհը փոխվում է։ Հավատում եմ, որ դրանք դեպի լավը տանող փոփոխություններ են, և հուսով եմ, որ մեր գործողություններով, վճռականությամբ և միևնույն ժամանակ մեր մտադրությունների, ծրագրերի, սկզբունքների բացությամբ մենք կկարողանանք աշխարհն ավելի արդար դարձնել», - ասել է Պուտինը։
Ռուսաստանի ղեկավարը հավատում է այնպիսի աշխարհի ստեղծմանը, «որտեղ բոլոր ժողովուրդներն իսկապես հավասար են, որտեղ յուրաքանչյուր ոք իրավունք ունի հարգված լինել, հետևել իր ավանդույթներին, խոսել իր մայրենի լեզվով, հարգել իր նախնիներին»:
Պուտինը երեխաների և երիտասարդների ռուսական շարժման մասնակիցներին մաղթել է շարունակել երազել և ոչ մեկին չընդօրինակել, սեփական նախագծեր կիրականացնել:
«Այստեղ՝ Մոսկվայում, հավաքվել են վառ ստեղծագործ ակտիվ երիտասարդներ ամբողջ երկրից, այդ թվում՝ հատկապես նշեմ` մեր նոր տարածաշրջաններից։ Եվ հիմա դուք ինքներդ, բոլորդ միասին որոշում եք, թե ինչպիսին պետք է լինի ձեր շարժումը, ինչ է պետք անել, որ այն իսկապես հետաքրքիր, գրավիչ դառնա ձեր հասակակիցների համար, որոշում եք դրա անվանումը, ծրագիրը», - ասել է նա։
ՌԴ նախագահն ավելացրել է, որ թեև շարժման բուն գաղափարը մեկ տարեկան էլ չկա, այն արագ իրագործվում է։