ԵՐԵՎԱՆ, 18 դեկտեմբերի – Sputnik. Հռոմի Ֆրանցիսկոս պապը կոչ է արել հանգուցալուծել Հայաստանը Լեռնային Ղարաբաղի հետ կապող Լաչինի միջանցքի շուրջ ստաղծված լարվածությունը։
«Ես մտահոգված եմ Հարավային Կովկասում Լաչինի միջանցքի շուրջ ստեղծված իրավիճակով, հատկապես մտահոգված եմ բնակչության ծանր հումանիտար պայմաններով, որոնք էլ ավելի են վատթարանալու ձմեռային սեզոնին»,- ասել է Հռոմի պապը ավանդական կիրակնօրյա քարոզից հետո։
Նա խնդրել է բոլոր ներգրավված կողմերին ջանքեր գործադրել ի շահ ժողովրդի խաղաղ լուծումներ գտնելու համար։
«Եկեք աղոթենք խաղաղության համար, և թող էլ բռնություն չլինի, թող սոցիալական և քաղաքական ճգնաժամը գնա խաղաղության ճանապարհով»,- ասել է պոնտիֆիկոսը։
Հիշեցնենք, որ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Մարդիկ զրկված էին ջեռուցումից, տաք ջրից, բուժհաստատությունները չէին կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել էր դասապրոցեսը։
Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։