ԵՐԵՎԱՆ, 16 դեկտեմբերի – Sputnik. Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարը մեկնաբանել է տեսանյութը, որում երևում են եվրոպական դիտորական առաքելության ներկայացուցիչները։
«Տեսանյութ է տարածվում այն մասին, թե ինչպես են Եվրոպական Միության առաքելության դիտորդները դիտարկում իրականացնում Լաչինի միջանցք տանող ճանապարհին։ Դիտորդն այդ ժամանակ եղել է հայ–ադրբեջանական սահմանից մոտ 1.2 կմ հեռավորության վրա գտնվող անցակետում։ ԵՄ դիտորդական առաքելությունը, իր մանդատի համաձայն, գործում է բացառապես Հայաստանի տարածքում և միջանցքի հատված չի մտել»,– Twitter–ում գրել է Կլաարը։
Ավելի վաղ տեսանյութ էր տարածվել և նշվել, որ ԵՄ դիտորդները Գորիս-Ստեփանակերտ ավտոճանապարհի փակ հատվածում դիտարկումներ են իրականացնում։
Հիշեցնենք, որ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Մարդիկ զրկված էին ջեռուցումից, տաք ջրից, բուժհաստատությունները չէին կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել էր դասապրոցեսը։
Այսօր առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։