ԵՐԵՎԱՆ, 16 դեկտեմբերի – Sputnik. «Դիլիջան ազգային պարկ» պետական ոչ առևտրային կազմակերպության տնօրենի պաշտոնակատարի անփութության արդյունքում ապօրինի հատվել է 32 հատ տարբեր տեսակի թաց, կանգուն ծառ՝ պետությանը պատճառելով առանձնապես խոշոր չափի՝ 2.217.500 ՀՀ դրամի գույքային վնաս: Տնօրենի ԺՊ–ին ազատել են աշխատանքից, նրան մեղադրանք է առաջադրվել։ Այս մասին հայտնում են ՀՀ քննչական կոմիտեի մամուլի ծառայությունից։
Մասնավորապես՝ քննությամբ փաստական տվյալներ են ձեռք բերվել այն մասին, որ ՊՈԱԿ–իտնօրենի պաշտոնակատարը, «Հաղարծին տեղամաս» մասնաճյուղի պահաբաժիններից մեկի անտառապահի պարտականությունները կատարողի անաշխատունակության վիճակում գտնվելու պայմաններում, վերջինիս պարտականությունների կատարումն այլ անձի չի հանձնարարել։ Արդյունքում պահաբաժինն օրեր շարունակ մնացել է առանց հսկողության:
«Տնօրենի պաշտոնակատարը համապատասխան հրամանով հիշյալ պահաբաժնի պահպանության պատասխանատվությունը ժամանակավորապես մեկ այլ անտառապահին հանձնելու կապակցությամբ հրամանով ստեղծել է հանձնաժողով, սահմանել հանձնման-ընդունման ժամանակահատված, հրամանի կատարման հսկողությունը վերապահել է իրեն, սակայն չի ապահովել հրամանի մասին պատշաճ ծանուցում նշված անտառապահին, հանձնում-ընդունում չի կատարվել, և վերոհիշյալ պահաբաժինը շարունակել է մնալ առանց հսկողության»,– նշված է հաղոդրագրությունում։
Քննությամբ ձեռք բերված բավարար ապացույցների համակցությամբ՝ «Դիլիջան ազգային պարկ» ՊՈԱԿ–իտնօրենի պաշտոնակատարին մեղադրանք է ներկայացվել ՀՀ քրեական օրենսգրքի 446-րդ հոդվածի 1-ին մասով (պատժվում է տուգանքով՝ առավելագույնը քսանապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով, կամ ազատության սահմանափակմամբ` առավելագույնը երկու տարի ժամկետով, կամ կարճաժամկետ ազատազրկմամբ` առավելագույնը երկու ամիս ժամկետով, կամ ազատազրկմամբ` առավելագույնը երկու տարի ժամկետով):
Վարույթն իրականացնող մարմնի որոշմամբ տնօրենի պաշտոնակատարի նկատմամբ որպես խափանման միջոց է ընտրվել պաշտոնավարման դադարեցումը։
Նշվում է, որ միջոցներ են ձեռնարկվում ապօրինի ծառահատումներ կատարած անձանց ինքնությունը պարզելու, նրանց հայտնաբերելու և վարույթն իրականացնող մարմնին ներկայացնելու ուղղությամբ: