ՄԱԿ–ի գրասենյակի մոտ ակցիա իրականացնողները պահանջեցին հանդիպում կառույցի ղեկավարի հետ

ԵՐԵՎԱՆ, 15 դեկտեմբերի – Sputnik. Երևանում ՄԱԿ–ի գրասենյակի մոտ նստացույց անող Արցախի պետական նախարարի խորհրդական Արտակ Բեգլարյանը, Մարդու իրավունքների պաշտպան Գեղամ Ստեփանյանը և նրանց աջակիցները պահանջեցին, որպեսզի Հայաստանում ՄԱԿ-ի մշտական համակարգողի պաշտոնակատար, զուգահեռաբար նաև ՅՈՒՆԻՍԵՖ–ի ներկայացուցիչ Քրիսթինե Վայգանդը դուրս գա և հակիրճ ներկայացնի վերջին 3-4 օրվա ընթացքում կատարած աշխատանքները։

Նշենք, որ դեկտեմբերի 12-ից Ադրբեջանը փակել է Ստեփանակերտ–Գորիս ճանապարհը և հումանիտար ճգնաժամ ստեղծել Արցախի Հանրապետությունում։

Նա ներկայացրեց Արցախում առկա իրավիճակը` երկրում վերջանում է մանկական կաթի փոշին, բազմաթիվ երեխաներ զրկված են դպրոց գնալու հնարավորությունից, արդեն դեղորայքի խնդիր կա, դադարեցված է գազամատակարարումը։

Ակցիայի մասնակիցները սկսեցին վանկարկել «Պահանջում ենք», սակայն ոչ ոք նրանց մոտ այդպես էլ դուրս չեկավ։

Ակցիայի մասնակիցներից մեկն էլ կոչ արեց սփյուռքում գտնվող հայերին այնտեղ էլ ակցիաներ իրականացնել, որպեսզի աշխարհում 24 ժամ շարունակ չլռի բողոքի ձայնը։

Հիշեցնենք, որ Արցախի Հանրապետության պետական նախարարը դեկտեմբերի 14-ից ՄԱԿ–ի գրասենյակի դիմաց անժամկետ նստացույց է սկսել Ադրբեջանի կողմից Լաչինի միջանցքը փակելու պատճառով։ Այս գիշեր նրա հետ այնտեղ մնացել է ևս 15-20 մարդ։

Դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։

Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։

Դեկտեմբերի 13-ից ադրբեջանական կողմն անջատել է նաև Արցախի գազամատակարարումը։ Մարդիկ զրկված են ջեռուցումից, տաք ջրից, բուժհաստատությունները չեն կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել է դասապրոցեսը։