ԵՐԵՎԱՆ, 15 դեկտեմբերի – Sputnik. «Հայաստանի ազգային արխիվ» պետական ոչ առևտրային կազմակերպության տնօրենի թափուր պաշտոնն զբաղեցնելու համար հայտարարված մրցույթի հարցազրույցի փուլն անցել ու տնօրեն է ընտրվել Արթուր Ստեփանյանը։ Տեղեկությունը հայտնում է ՀՀ արդարադատության նախարարությունը։
«Արդարադատության նախարարության գլխավոր քարտուղար Սիրվարդ Գևորգյանն Ազգային արխիվի աշխատակազմին է ներկայացրել նորանշանակ տնօրենին՝ մաղթելով բեղմնավոր գործունեություն և տոկունություն»,–նշված է հաղորդագրության մեջ։
Արթուր Ստեփանյանը նախկինում զբաղեցրել է ՀՀ դատական դեպարտամենտի ղեկավարի խորհրդականի, ՀՀ դատական դեպարտամենտի ղեկավարի տեղակալի պաշտոնները։
Նշենք, որ հոկտեմբերի 27–ից «Հայաստանի ազգային արխիվ» ՊՈԱԿ-ի տնօրենի ժամանակավոր պաշտոնակատարն էր Սերգեյ Սարուխանյանը։
Հիշեցնենք, որ Ազգային արխիվի նախկին տնօրեն Ամատունի Վիրաբյանի նկատմամբ քրեական գործ էր հարուցվել 2020թ.–ի օգոստոսի 14-ին` քաղաքացու բողոքի հիման վրա, որից հետո նա ազատվել էր աշխատանքից։
Այս տարի հունիսին ՀՀ վերաքննիչ քաղաքացիական դատարանը` մերժելով արդարադատության նախարար Ռուստամ Բադասյանի անունից ներկայացված վերաքննիչ բողոքը, որոշել էր, որ Ամատունի Վիրաբյանը կվերականգնվի իր պաշտոնում։
ՀՀ վճռաբեկ դատարանը 2022 թվականի հունիսին որոշել էր բեկանել ՀՀ վերաքննիչ քաղաքացիական դատարանի որոշումը՝ աշխատողին նախկին աշխատանքում վերականգնելու և հարկադիր պարապուրդի գումարը բռնագանձելու պահանջների մասերով, և գործն այդ մասերով ուղարկել Երևան քաղաքի առաջին ատյանի ընդհանուր իրավասության դատարան՝ նոր քննության: