ԵՐԵՎԱՆ, 15 դեկտեմբերի – Sputnik. Արցախի Հանրապետության պետական նախարարի խորհրդական Արտակ Բեգլարյանը շարունակում է իր նստացույցը ՄԱԿ–ի դիմաց։ Sputnik Արմենիայի հետ զրույցում նա նշեց, որ գիշերն իր հետ շուրջ 15-20 մարդ մնացել է այնտեղ։
«Այժմ նրանցից շատերը գնացել են հիգիենայի հարցերը լուծելու, բայց մի մասն արդեն վերադարձել է։ Անձամբ ես գիշերը 2-3 ժամ հանգստացել եմ մեքենայում, քանի որ վրանի հնարավորություն չկա։ Մեր ընկերներն էլ նույն կերպ գիշերել են այստեղ»,– ասաց Բեգլարյանը։
Նա կարևորեց այն հանգամանքը, որ տարբեր քաղաքացիներ միանում են ու ցանկանում են միանալ իրենց նստացույցին` ընդգծելով, որ կապ չունի, թե ինչպես է դա արվում` լինի դասադուլ, գործադուլ, թե մեկ այլ տարբերակով։
Կեսօրից հետո Արտակ Բեգլարյանը, նրա կողմնակիցները, տարբեր կազմակերպություններ լրացուցիչ և ապակենտրոնացված ակցիաներ են անելու, հնչելու են նաև հայտարարություններ։
«Մեր պահանջները նույնն են։ ՄԱԿ–ի մարմիններից արձագանք և հստակ գործողություններ ենք սպասում»,– նշեց Բեգլարյանը։
Հիշեցնենք, որ Արցախի Հանրապետության պետական նախարարը դեկտեմբերի 14-ից ՄԱԿ–ի գրասենյակի դիմաց անժամկետ նստացույց է սկսել Ադրբեջանի կողմից Լաչինի միջանցքը փակելու պատճառով։
Դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել է նաև Արցախի գազամատակարարումը։ Մարդիկ զրկված են ջեռուցումից, տաք ջրից, բուժհաստատությունները չեն կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել է դասապրոցեսը։