ԵՐԵՎԱՆ, 14 դեկտեմբերի – Sputnik. Իրանն ու ԵԱՏՄ–ն ավարտել են ազատ առևտրի գոտի ստեղծելու վերաբերյալ բանակցությունները` համապատասխան համաձայնության հասնելով։ Այս մասին ասուլիսի ժամանակ հայտարարել է ՌԴ–ում Իրանի դեսպան Քազեմ Ջալալին։
«Իրանի և ԵԱՏՄ քարտուղարության միջև ազատ առևտրի գոտու վերաբերյալ բանակցություններն ավարտվել են», – ասել է իրանցի դիվանագետը։
Նրա խոսքով` ձեռք բերված պայմանավորվածությունը պետք է վավերացվի ԵԱՏՄ երկրների խորհրդարաններում, ինչպես նաև բուն Իրանում։
Ավելի վաղ Իրանի առևտրի զարգացման կազմակերպության ղեկավար Ալիռեզա Փայմանփաքը հայտնել էր, որ ԵԱՏՄ–ի հետ ազատ առևտրի գոտու կազմակերպման վերաբերյալ իրավաբանական հարցերը նախատեսվում է կարգավորել մեկ ամսվա ընթացքում։ ՌԴ փոխվարչապետ Ալեքսանդր Նովակը ևս հայտնել էր, որ Ռուսաստանն ու Իրանը պայմանավորվել են առաջիկայում ԵԱՏՄ–ի հետ ազատ առևտրի գոտու վերաբերյալ համաձայնագիր ստորագրել։