ԵՐԵՎԱՆ, 14 դեկտեմբերի – Sputnik. Լաչինի միջանցքը փակելը վկայում է, որ պետք է խաղաղապահների գործունեության ժամկետի երկարաձգման վերաբերյալ քննարկումները առարկայական դառնան։ Ազգային ժողովի արտահերթ նիստում այս հայտարարությունն արեց «Քաղաքացիական պայմանագիր» խմբակցության ղեկավար Հայկ Կոնջորյանը։
Ավելի վաղ հայտնել էինք, որ Ազգային ժողովում արտահերթ նիստ է, որի օրակարգում մեկ հարց է` Ադրբեջանի կողմից ԼՂ–ում հումանիտար ճգնաժամ հարուցելու մասին ԱԺ հայտարարության նախագիծը, որը ներկայացրել է ՔՊ–ն։ Ընդդիմությունը չի մասնակցում քննարկմանը, քանի որ նրանք նույնպես նախագիծ էին ներկայացրել և արտահերթ նիստ անելու առաջարկով հանդես եկել, որը մերժվել է։
«Ռուս խաղաղապահների հետ մշտական քննարկումներ են գնում, աշխատանք է տարվում, որպեսզի կարողանանք կանխել սադրանքները Լաչինի միջանցքում։ Հանրության շրջանում իսկապես այդ ակնկալիքը կա, որպեսզի ռուս խաղաղապահ զորախումբը ձեռնարկի բոլոր միջոցները, որ Լաչինի միջանցքը բացվի, և այս հումանիտար հասունացող աղետը, որը սադրել է Ադրբեջանը, արագ հանգուցալուծում ստանա»,–ասաց Կոնջորյանը։
Նրա խոսքով` Ադրբեջանը, Լաչինը փակելով, հստակ և նպատակաուղղված կերպով տանում է ռուսական խաղաղապահների արժեզրկման և հեղինակազրկման գործունեություն։
Հիշեցնենք՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։
Դեկտեմբերի 13-ից ադրբեջանական կողմն անջատել է նաև Արցախի գազամատակարարումը։ Մարդիկ զրկված են ջեռուցումից, տաք ջրից, բուժհաստատությունները չեն կարողանում ապահովել առաջնային բժշկական օգնություն, Արցախի ուսումնական հաստատություններում, որոնք ջեռուցվում են գազով, դադարեցվել է դասապրոցեսը։