ԵՐԵՎԱՆ, 14 դեկտեմբերի – Sputnik. ԱԺ–ն Լաչինի միջանցքում ստեղծված իրավիճակի շուրջ արտահերթ նիստ կանցկացնի։ Այս մասին այսօր խորհրդարանում Հարկային օրենսգրքում փոփոխությունների հարցով կազմակերպված լսումների ժամանակ հայտարարեց ՔՊ պատգամավոր, տնտեսական հարցերի մշտական հանձնաժողովի նախագահ Բաբկեն Թունյանը։
«Մենք այսօր մի քիչ էքստրաօրդինար վիճակում ենք այս նիստը անելու։ Ինչպես գիտեք, դեկտեմբերի 12–ի առավոտից Ադրբեջանը փակել է Լաչինի ճանապարհը, և դրա հետ կապված մենք այսօր արտահերթ նիստ ենք ունենալու, ժամը երևի 13։00-13։30-ի կողմերը»,– ասաց Թունյանը` լսումների մասնակիցներին խնդրելով պահպանել հատկացված ժամանակը` ԱԺ արտահերթ նիստը ժամանակին սկսելու համար։
Նա նաև նշեց, որ արտահերթ նիստում խորհրդարանը Լաչինի հարցով հայտարարություն կընդունի։
Հիշեցնենք՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։