ԵՐԵՎԱՆ, 13 դեկտեմբերի - Sputnik. Ամերիկացի գործարար Իլոն Մասկը հայտնել է, որ մի քանի ամսվա ընթացքում Twitter սոցիալական ցանցի օգտատերերին նախկինում տրված կապույտ նշանները, որոնք ծառայում են հաշվի նույնականացման համար, կջնջվեն, հայտնում է ՌԻԱ Նովոստին:
«Մի քանի ամսվա ընթացքում մենք կհեռացնենք բոլոր հնացած կապույտ նշանները: Այն սկզբունքը, որով դրանք տրվում էին, կոռումպացված էր և անհեթեթ»,-գրել է Մասկը Twitter-ում` պատասխանելով օգտատերերից մեկին։
Ավելի վաղ Twitter-ը հայտնել էր, որ Twitter Blue-ի բաժանորդագրությունների վաճառքը սոցիալական ցանցում կվերագործարկվի դեկտեմբերի 12-ին, և հետևորդները, ի թիվս այլ բաների, հնարավորություն կունենան խմբագրել հրապարակումները, 1080p որակի տեսանյութեր ներբեռնել և կապույտ նշան ստանալ` օգտահաշիվը ստուգելուց հետո:
Բացի այդ, ընկերությունը կսկսի ոսկեգույն նշաններ բաշխել ընկերություններին, իսկ «կառավարական և բազմակողմ հաշիվներին»` մոխրագույն նշաններ: Հետևորդները կկարողանան փոխել իրենց անունը կամ գլխավոր լուսանկարը, բայց փոխելիս ժամանակավորապես կկորցնեն կապույտ նշանը, մինչև նրանց հաշիվը կրկին ստուգվի:
Ամերիկյան Twitter Inc. ընկերությունը հիմնադրվել է 2006 թվականին։ Ընկերության հիմնական արտադրանքը կարճ հաղորդագրությունների փոխանակման սոցիալական ցանցն է։ Կենտրոնակայանը գտնվում է Կալիֆոռնիա նահանգի Սան Ֆրանցիսկո քաղաքում:
Իլոն Մասկը 2022 թվականի հոկտեմբերին 44 միլիարդ դոլարով ձեռք է բերել առցանց հարթակը, ինչից հետո Twitter-ը մի շարք փոփոխությունների է ենթարկվում ինչպես ընկերության կառավարման, այնպես էլ բուն սոցիալական ցանցի քաղաքականությունների հարցում։