ԵՐԵՎԱՆ, 13 դեկտեմբերի – Sputnik. Բրյուսելում ԵՄ երկրների էներգետիկայի նախարարների խորհրդում չի հաջողվել համաձայնեցնել գազի գների առավելագույն շեմը, քննարկումները շարունակվում են: Տեղեկությունը սոցցանցում հայտնել է Հունգարիայի արգոծնախարար Պետեր Սիյարտոն։
«Էներգետիկ խորհրդում մեծ բանավեճ է, լիագումար նիստում համաձայնության հասնել չի հաջողվել, ուստի շարունակությունն ընթանում է երկկողմ ձևաչափով։ Նախագահում է Չեխիայի արդյունաբերության նախարար Յոզեֆ Սիկելան, նրան նույնպես կարող եմ ասել, որ գազի գնի առավելագույն շեմ սահմանելը վատ գաղափար է», - գրել է Սիյարտոն սոցցանցում՝ բանակցություններից Սիկելայի հետ լուսանկար հրապարակելով։
Սիյարտոյի խոսքով՝ Բրյուսելը «վատ է հաղթահարում» Եվրոպայի էներգետիկ ճգնաժամը, եթե գազի գնիառավելագույն շեմի պես վատ գաղափարներ է առաջարկում։
Հիշեցնենք, որ Արևմուտքի երկրների նավթային պատժամիջոցներն ուժի մեջ են մտել դեկտեմբերի 5-ից։ Եվրամիությունը դադարում է ընդունել ծովով տեղափոխվող ռուսական նավթը, իսկ «Մեծ յոթնյակի» երկրները, Ավստրալիան և Եվրամիությունը սահմանափակում են սահմանում դրա ծովային փոխադրումների գների համար` մեկ բարելի դիմաց 60 դոլար։
ՌԴ փոխվարչապետ Ալեքսանդր Նովակը, մեկնաբանելով որոշումն ու առաջիկա էմբարգոն, ասել էր, որ Ռուսաստանը չի ընդունի նավթի գների առավելագույն շեմղը, եթե անգամ ստիպված լինի կրճատել արդյունահանումը: Նա հավելել է, որ նման սահմանափակումները միջամտություն են շուկայական գործիքներին, Ռուսաստանը պատրաստ է աշխատել միայն այն սպառողների հետ, որոնք կաշխատեն շուկայական պայմաններով: