ԵՐԵՎԱՆ, 9 դեկտեմբերի – Sputnik. Հայաստանում սոցիալ–տնտեսական զարգացման հիմնախնդիրներն առաջացել են կրթության ոլորտում առկա խնդիրների հետևանքով։ Այս մասին «Հայաստանի Հանրապետության սոցիալ–տնտեսական զարգացման արդի հիմնախնդիրները» թեմայով հանրապետական գիտաժողովում ասաց ՀՀ նախագահ Վահագն Խաչատուրյանը։
«Այսօր ՀՀ–ի առջև ծառացած ամենակարևոր մարտահրավերը երկրի անվտանգությունն է, և այդ խնդիրը մենք պետք է կարողանանք լուծել` մեթոդները փոխելով։ Երկրորդ կարևոր խնդիրը կրթության ոլորտում է. մենք բոլոր բնագավառներում մասնագետների լրջագույն խնդիր ունենք։ Վստահ եմ` առանց այդ համակարգի ֆունդամենտալ փոփոխության չենք կարող հաջողություններ ունենալ։ Սոցիալ–տնտեսական զարգացման հիմնախնդիրն էլ հենց այս ամենից է գալիս»,– նշեց Խաչատուրյանը։
Հայաստանի պետական տնտեսագիտական համալսարանի ռեկտոր Դիանա Գալոյանն էլ անդրադառնալով ՀՀ–ում տնտեսական աճին, նշեց, որ դա եղել է և՛ ՌԴ–ից, Ուկրաինայից, Բելառուսից ժամանակ ռելոկանտների, և՛ ՀՀ մի շարք ոլորտների շնորհիվ։
Դիանա Գալոյան
© Sputnik / Asatur Yesayants
«Տնտեսական աճի առումով երկու սցենար կարող է հաջորդ տարի գրանցվել։ Նշածս երկրներից ժամանած անձինք գուցե որոշեն հեռանալ Հայաստանից, սակայն կարող է լինել նաև հակառակը, քանի որ ենթադրվում է, թե ռազմական գործողությունը դեռ երկար կտևի ու ռելոկանտները դեռ կշարունակեն գործել մեր աշխատաշուկայում։ Չեմ կարծում, թե ՀՀ տնտեսական աճն ամբողջությամբ նրանց շնորհիվ է գրանցվել, մեզ մոտ մի շարք ոլորտներում առաջընթացներ են նկատվում։ Չեմ բացառում, որ այս երկու գործոնի սիմբիոզի շնորհիվ գուցե լինի 7 տոկոս տնտեսական աճ»,–ասաց Գալոյանը` պատասխանելով Sputnik Արմենիայի հարցին։
Նրա խոսքով` վերջին շրջանում Հայաստանում աճ է գրանցվում սննդի արդյունաբերության, տեքստիլ արտադրության ոլորտներում։ Գյուղատնտեսությունը ևս բավականին մեծ աճ է գրանցել, հատկապես ջերմոցային կուլտուրաների շնորհիվ։ Գալոյանը հավելեց` գյուղատնտեսական ապրանքի սպառման հետ կապված Հայաստանի համար շուկայի խնդիր չկա, քանի որ որքան էլ արտադրվի, հնարավոր է վաճառել ռուսական շուկայում կամ ԵԱՏՄ անդամ մյուս երկրներում։