ԵՐԵՎԱՆ, 9 դեկտեմբերի – Sputnik. Հայաստանը մինչև տարեվերջ 100 մլն դոլար և 100 մլն եվրո վարկ կվերցնի միջազգային բանկերից։ Ազգային ժողովն արտահերթ նիստում ընդունեց «ՀՀ–ի և Ասիական զարգացման բանկի միջև 2022 թվականի նոյեմբերի 17-ին ստորագրված «Հարկաբյուջետային կայունության և ֆինանսական շուկաների զարգացման ծրագիր» վարկային համաձայնագիրը վավերացնելու մասին և «ՀՀ–ի ու Զարգացման ֆրանսիական գործակալության միջև 2022 թվականի նոյեմբերի 17-ին ստորագրված վարկային համաձայնագիրը վավերացնելու մասին» օրենքների նախագծերը։
Ֆինանսների փոխնախարար Վահե Հովհաննիսյանը հայտնեց, որ Ասիական զարգացման բանկի տրամադրած վարկը լինելու է լողացող տոկոսադրույքով, տրամադրվելու է 12 տարի ժամկետով, որից 3 տարին` արտոնյալ ժամկետով։
Զարգացման ֆրանսիական գործակալության տրամադրած վարկի դեպքում կառավարությունն ինքը կարող է ընտրություն կատարել` ֆիքսված, թե լողացող տոկոսադրույքով։ Ֆիքսվածի դեպքում տոկոսադրույքը կլինի 3.87։
«Սա համապատասխանում է Արժույթի միջազգային հիմնադրամի հետ ունեցած մեր պայմանավորվածություններին, ըստ այդմ` ներգրավվող վարկերը պետք է ունենան առնվազն 30 տոկոս գրանտային էլեմենտ»,– նշեց նա։
«Հայաստան» խմբակցության պատգամավոր Արթուր Խաչատրյանը հետաքրքրվեց, թե ինչու է կառավարությունը վարկ վերցնում, եթե ՀՀ վարչապետը բազմաթիվ անգամ հայտարարել է, թե փող շատ կա։
«Աշխարհում միայն մի քանի պետություն կա, որտեղ բյուջեն դեֆիցիտային չէ, քանի որ կառավարությունը միշտ ծախսում է ավելի շատ գումար, քան հարկ է հավաքում։ 2022 թ.–ի բյուջեով նախատեսված է եղել, որ մենք ունենալու ենք 3 տոկոս դեֆիցիտ, դրանով էլ հենց պայմանավորված է, որ պետք է բյուջետային աջակցության վարկ վերցնեինք»,– , պատասխանեց փոխնախարարը։
Հավելենք, որ առաջին նախագծին պատգամավորները քվեարկեցին 60 կողմ, 26 դեմ հարաբերակցությամբ, երկրորդին` 64 կողմ, 27 դեմ։