ԵՐԵՎԱՆ, 9 դեկտեմբերի – Sputnik. ԱՄՆ նախագահ Ջո Բայդենը Ռուսաստանի քաղաքացի Վիկտոր Բուտին (որը գրեթե 15 տարի անցկացրել է ԱՄՆ-ի բանտում) ներում շնորհելու հրամանագրում արգելել է նրան վերադառնալ Նահանգներ, ինչպես նաև եկամուտ ստանալ իր կյանքի մասին գեղարվեստական կամ այլ ստեղծագործություններից։ Այս մասին հայտնում է ՌԻԱ Նովոստին՝ հղում անելով ԱՄՆ արդարադատության նախարարության կողմից հրապարակած նախագահի հրամանագրին։
«Վիկտոր Բուտը չպետք է վերադառնա Միացյալ Նահանգներ երկրից կամավոր կամ հարկադիր հեռացումից հետո»,-նշել է Բայդենը։
Փաստաթուղթը ստորագրվել է դեկտեմբերի 2-ին։
Վիկտոր Բուտը գրեթե 15 տարի բանտարկված էր Միացյալ Նահանգներում: Նա ԱՄՆ-ի խնդրանքով ձերբակալվել էր Թաիլանդում 2008 թվականին` ամերիկյան հատուկ ծառայությունների սադրիչ գործողության արդյունքում, իսկ հետո տեղափոխվել էր ԱՄՆ։ Նրան մեղադրում էին ԱՄՆ քաղաքացիների սպանության և ահաբեկչությանը նյութական աջակցություն ցուցաբերելու նպատակով դավադրություն նախապատրաստելու մեջ։ Բուտը հերքում էր բոլոր մեղադրանքները։
Բուտն ԱՄՆ էր տեղափոխվել ինչպես թաիլանդական, այնպես էլ ամերիկյան օրենսդրությունների կոպիտ խախտումներով։ 2012 թվականին Նյու Յորքի երդվյալ ատենակալների դատարանը նրան մեղավոր էր ճանաչել, ինչից հետո դաշնային դատարանը 25 տարվա ազատազրկման էր դատապարտել նրան։