ԵՐԵՎԱՆ, 7 դեկտեմբերի - Sputnik. Ռուսաստանի մոտ երկրներն ու դաշնակիցներն աշխարհում կոնֆլիկտայնության աճի պայմաններում նրա համար նոր դեր և առաջնահերթություն են ստանում։ Այս մասին Sputnik Արմենիա մուլտիմեդիոն մամուլի կենտրոնում հայտարարեց ռուսաստանցի քաղտեխնոլոգ, «Անալիտիկ» կենտրոնի ղեկավար Անդրեյ Մոզոլինը։
Փորձագետը մեջբերեց ՌԴ նախագահ Վլադիմիր Պուտինի վերջերս արված հայտարարությունն այն մասին, որ Ռուսաստանը բավական բուռն տասնամյակ է թևակոխում, երբ վերափոխվելու է բուն միջազգային հարաբերությունների համակարգը։
«Տեսնում ենք, որ Ռուսաստանն իր կողմնորոշումը շրջում է դեպի Արևելք։ Իսկ Արևելքը միայն Չինաստանը չէ, այլև Կովկասն ու Միջին Ասիան։ Այս տարածաշրջանների երկրներն առաջնահերթ են դառնում զարգացման տեսանկյունից, նախևառաջ` տնտեսական համագործակցության։ Իսկ տնտեսական կապերը հանգեցնում են քաղաքական փոխգործակցության ակտիվացմանը», – ասաց Մոզոլինը։
Միևնույն ժամանակ այս ամենը, սակայն, կմեծացնեն կոնֆլիկտայնությունը նշված տարածաշրջանների երկրներում։ Մի կողմից` բարեկամական հարաբերություններ կան Ռուսաստանի հետ, մյուս կողմից` այլ գլոբալ խաղացողներ, որոնք շահագրգռված չեն Ռուսաստանի ներկայության և նրա ուժեղացման հարցում։
Մոզոլինի խոսքով` նույն ԱՄՆ–ն, ԵՄ–ն, ինչպես և ԵՄ առանձին պետություններն իրենց շահերն ունեն հետխորհրդային տարածքում։ Եվ իրենց պատկերացումներն ունեն Ռուսաստանի նկատմամբ կոնֆլիկտայնության աստիճանի բարձրացման առումով։ Իրենց նախասիրություններն ու շահերը ունեն նաև Թուրքիան, Իրանն ու Չինաստանը, ինչն իհարկե, ըստ քաղտեխնոլոգի, կրակ կլցնի յուղի վրա։
Միևնույն ժամանակ, Մոզոլինը համոզված է, որ երկար սպասելու կարիք չի լինի, մինչև Ռուսաստանն ավելի հստակ կկարողանա ձևակերպել իր շահերը մերձակա արտասահմանում։
Որպես կոնֆլիկտաբան Մոզոլինը պնդում է, որ Հայաստանը մեծ հետաքրքրություն է ներկայացնում գիտական այս առարկայով զբաղվող մարդկանց համար։ Երկիրը ԼՂ–ի հետ կապված հակամարտության ավելի քան 30 տարվա պատմություն ունի։ Բացի այդ, հասարակաքաղաքական ոլորտն ինքնին շատ հետաքրքիր է՝ հաշվի առնելով երկրի ներսում ընթացող բուռն գործընթացները։
Նշենք, որ «Անալիտիկ» կենտրոնի աշխատանքի հիմնական ուղղությունը էկոնոմիկայի և պետական կառավարման ոլորտներում արդյունավետ լուծումների մշակումն է։ Այն է՝ հանրային կոնֆլիկտների կառավարում, հակաճգնաժամային միջոցառումների մշակում և արդյունավետ հաղորդակցությունների կառուցում։ Վերլուծական կենտրոնն աշխատելու փորձ ունի ոչ միայն Ռուսաստանում, այլև մերձավոր արտասահմանի երկրներում։