ԵՐԵՎԱՆ, 6 դեկտեմբերի - Sputnik. Ինչո՞ւ է դատարանը վարույթային հարցերը լուծում դատական նիստի դահլիճից դուրս` աշխատասենյակում, ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործով հերթական դատական նիստին նման հարց բարձրացրեց դատախազ Գևորգ Բաղդասարյանը։
Դատախազի բարձրացրած հարցի պատճառը դատավոր Աննա Դանիբեկյանի կողմից առանց դատական նիստ հրավիրելու Ռոբերտ Քոչարյանին քաղաքից բացակայելու թույլտվություն տրամադրելն էր նախ նոյեմբերի 29–ից դեկտեմբերի 4–ը, ապա դեկտեմբերի 6–ից դեկտեմբերի 13–ը։
«Խափանման միջոց գրավի պայմաններից մեկը սահմանահատման արգելքն է։ Դուք խափանման միջոցը փաստացի չեզոքացնում եք դատական նիստերի դահլիճից դուրս։ Ինչի՞ եք Ռոբերտ Քոչարյանի քաղաքից բացակայելու հարցը քննարկում դատական նիստերի դահլիճից դուրս, Արմեն Գևորգյանինը՝ դատական նիստերի դահլիճում։ Սա որերորդ անգամն է»,–ասաց Բաղդասարյանը։
Նա նշեց, որ առարկում է դատավորի գործողությունների դեմ և պարզաբանում է ակնկալում։
Դատավոր Դանիբեկյանը, սակայն, արձագանքեց, որ դատարանը պարտավոր չէ պարզաբանումներ ներկայացնել։
Այնուամենայնիվ դատախազության հայտարարությանը արձագանքելով` դատավորը նշեց, որ եթե դատարանը բավարար է համարում սահամանահատումը կազմակերպելու համար կողմի ներկայացրած հիմքերը, ապա թույլտվությունը կարող է տալ առանց դատական նիստի` հաշվի առնելով հարցի հրատապությունը։
Նշենք, որ այսօրվա դատական նիստին ներկա չէր Ռոբերտ Քոչարյանը։ ՀՀ երկրորդ նախագահի փաստաբան Հովհաննես Խուդոյանը հայտնեց, որ Ռոբերտ Քոչարյանը չի կարող դատական նիստին ներկայանալ առողջական խնդիրների պատճառով` ներկայացնելով համապատասխան բժշկակական փաստաթուղթը։ ՀՀ երկրորդ նախագահն այս պահին երկրում չէ։
Նիստը հետաձգվեց. հաջորդը տեղի կունենա դեկտեմբերի 13–ին, ժամը 13։00–ին։
ՀՀ նախկին նախագահ Ռոբերտ Քոչարյանն ու նախկին փոխվարչապետ Արմեն Գևորգյանը որպես մեղադրյալ են անցնում մեկ քրեական գործի շրջանակներում։ Քոչարյանին մեղադրում են առանձնապես խոշոր չափի կաշառք ստանալու, իսկ Գևորգյանին՝ փողերի լվացման մեջ։