ԵՐԵՎԱՆ, 6 դեկտեմբերի – Sputnik. Լեհաստանը Ուկրաինային մատակարարել է խորհրդային արտադրության С-125 «Նևա» զենիթահրթիռային համալիրներ։ Այս մասին ասել է Լեհաստանի նախարարների խորհրդի անդամ Միխալ Դվորչիկը, գրում է ՌԻԱ Նովոստին։
Ավելի վաղ Դվորչիկը Twitter-ում հրապարակել էր ուկրաինացի զինվորականներով շրջապատված С-125-ի լուսանկարը և կից գրառում կատարել.
«Ես չգիտեմ՝ այս լուսանկարն արդեն եղել է, թե ոչ, բայց այն միշտ աչք է շոյում։ Լեհական С-125 «Նևան» սպասարկում է Ուկրաինայի զինված ուժերը»,- նշել է նախարարը։
С-125 համալիրը սպառազինության է ընդունվել ԽՍՀՄ կողմից 1961 թվականին։ Արտահանվել է մի քանի հարյուրը։
Բաց աղբյուրների համաձայն՝ լեհ զինվորականներն իրենց տրամադրության տակ ունեն 17 նման համալիրներ։
Ավելի վաղ Լեհաստանի իշխանությունները հայտնել էին Ուկրաինային տանկերի, ինքնագնաց հաուբիցների, զենիթահրթիռային համալիրների, անօդաչու թռչող սարքերի, զինամթերքի, ինքնաթիռների պահեստամասերի և այլ ռազմական տեխնիկայի մատակարարման մասին։ Երկրի իշխանությունների տվյալներով՝ Լեհաստանն իր ՀՆԱ-ի մոտ 1%-ը ծախսել է Ուկրաինային զենք մատակարարելու վրա։
Հիշեցնենք` Ռուսաստանը ՆԱՏՕ-ի երկրներին նոտա էր հղել Ուկրաինային զենք մատակարարելու համար։ ՌԴ արտգործնախարար Սերգեյ Լավրովը նշել էր, որ ցանկացած բեռ, որը Ուկրաինայի համար նախատեսված զենք է պարունակում, օրինական թիրախ կդառնա Ռուսաստանի համար։
ՌԴ ԱԳՆ-ն նշել էր, որ ՆԱՏՕ-ի երկրները կրակի հետ են խաղում՝ զենք մատակարարելով Ուկրաինային։ ՌԴ նախագահի մամուլի քարտուղար Դմիտրի Պեսկովն ասել էր, որ Արևմուտքի կողմից Ուկրաինային զենք մատակարարելը չի նպաստում ռուս-ուկրաինական բանակցությունների հաջողությանը ու բացասական ազդեցություն կունենա: