ԵՐԵՎԱՆ, 6 դեկտեմբերի – Sputnik. Հայաստանն Ադրբեջանից առաջարկներ է ստացել խաղաղության պայմանագրի վերաբերյալ։ Երևանն ու Բաքուն սկսում են բանակցային գործընթացի երրորդ փուլը։ Այս մասին խորհրդարանում հայտնեց ԱԺ արտաքին հարաբերությունների մշտական հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Էդուարդ Աղաջանյանը։
«Այո, իսկապես, հայկական կողմը ստացել է Ադրբեջանի առաջարկները, որոնք, ըստ էության, պատասխան են հայկական կողմի առաջարկներին։ Կարելի է ասել, որ քննարկվում է առաջարկների երրորդ փուլը։ Կարծում եմ` սխալ է փաստաթուղթ անվանելը այս պահին։ Այլ մանրամասներ չեմ կարող ներկայացնել», - ասաց Աղաջանյանը` հավելելով, որ քանի որ մանրամասները և քննարկումները հրապարակման ենթակա չեն, չի կարող հրապարակայնացնել դրանք։
Աղաջանյանը նաև հայտնեց, որ չի բացառվում` մինչև տարեվերջ կարող է լինել Փաշինյան–Ալիև կամ երկու երկրների ԱԳ նախարարների մակարդակով հանդիպում։
Հիշեցնենք՝ վարչապետ Նիկոլ Փաշինյանը նոյեմբերի 16-ին ԱԺ-ում կառավարության հետ հարցուպատասխանի ժամանակ ասել էր, որ նոյեմբերի 7-ին Վաշինգտոնում խաղաղության պայմանագրին վերաբերող տեքստ է փոխանցվել ադրբեջանական կողմին, սպասում են Ադրբեջանի արձագանքին։