ԵՐԵՎԱՆ, 6 դեկտեմբերի – Sputnik. Հայաստանի և Իրանի միջև ապրանքաշրջանառությունը 2022 թվականի առաջին 10 ամիսների ընթացքում ավելացել է 45,3%–ով` հասնելով 565,6 մլն դոլարի։ Այս մասին նախարարությունում Իրանի հետ բիզնեսի ոլորտում համագործակցության հեռանկարները քննարկելուց հետո լրագրողներին հայտնեց ՀՀ էկոնոմիկայի փոխնախարար Արմեն Արզումանյանը։
Ինչպես նշեց Արզումանյանը, 2021 թվականի համեմատ (390 մլն դոլարից ավելի) այս տարի կայուն աճ էր գրանցվել, որին հաջողվել էր հասնել նաև երկու երկրների առևտրային կցորդների աշխատանքի շնորհիվ։
«Այդ ցուցանիշը նշանակում է, որ բիզնես համագործակցությունը զարգանում է դրական հունով», –ասաց նա։
Փոխնախարարը հույս հայտնեց, որ աճ կլինի նաև դեկտեմբերին։ Արզումանյանի խոսքով` ցուցանիշը հիմնականում բարելավվել է հայկական արտադրանքի արտահանման հաշվին։ Փոխնախարարը կարծում է, որ Հայաստանը կարող է ավելացնել ծավալները։
«Հայկական արտադրանքը որակյալ է, համապատասխանում է իրանցի սպառողի ճաշակին։ Սական 80-միլիոնանոց շուկայում մրցակցելու համար անհրաժեշտ է սեփական տեղը գտնել»,–ասաց էկոնոմիկայի փոխնախարարը։
Նա կարծում է, որ երկու երկրների ապրանքաշրջանառության դինամիկայի վրա կարող է ազդել ԵԱՏՄ երկրների հետ Իրանի համագործակցության հաստատումը` հաշվի առնելով այն, որ միության երկրներից Իրանի հետ ընդհանուր սահման ունի միայն Հայաստանը։
«Այդպիսով` ԵԱՏՄ երկրների համար ապրանքները կտեղափոխվեն մեր տարածքով», – ասաց Արզումանյանը։
Նա հավելեց, որ երկու երկրների ղեկավարները նպատակ են դրել ապրանքաշրջանառությունը հասցնել 3 մլրդ դոլարի։ Այդ նպատակով էլ գործարար շրջանակների ներկայացուցիչների մասնակցությամբ նախարարությունում քննարկում էր կազմակերպվել։