ԵՐԵՎԱՆ, 4 դեկտեմբերի – Sputnik. ԱՄՆ պետքարտուղար Էնթոնի Բլինկենը հայտարարել է, որ ՌԴ-ի հետ բանակցությունները հնարավոր են, եթե Մոսկվան շահագրգռվածություն ցուցաբերի դիվանագիտության հարցում։
Ավելի վաղ Ֆրանսիայի նախագահ Էմանուել Մակրոնը նշել էր, որ Փարիզն ու Վաշինգտոնը պետք է երկխոսություն նախապատրաստեն Ռուսաստանի և Ուկրաինայի միջև, նրա խոսքով՝ Եվրոպայի անվտանգության ապագա ճարտարապետությունը պետք է անվտանգության երաշխիքներ ներառի Ռուսաստանի համար։
«Դիվանագիտության արժեքը միշտ գոյություն ունի, եթե ներգրավված կողմերը, տվյալ դեպքում՝ Ռուսաստանը, շահագրգռված են էական դիվանագիտության հարցում»,-ասել է Բլինկենը CBS հեռուստաալիքին։
Նա ընդգծել է, որ Ռուսաստանի հետ բանակցություններն օրակարգում չեն լինի, քանի դեռ երկրի ղեկավարությունը շահագրգռվածություն չի ցուցաբերել դրանց էական ելքի հարցում, ներկայումս, ինչպես պնդում Է պետքարտուղարը, Մոսկվան հակառակն է ցույց տալիս:
«Քանի դեռ (ՌԴ նախագահ Վլադիմիր) Պուտինը ցույց չի տվել, որ ինքը շահագրգռված է էական դիվանագիտության հարցում, քիչ հավանական է, որ ինչ-որ առաջխաղացում լինի»,-ասել է ԱՄՆ պետքարտուղարը:
ՌԴ նախագահն ավելի վաղ հայտարարել էր, որ Ռուսաստանը միշտ ասել է, որ բաց է Ուկրաինայի շուրջ բանակցությունների համար, եթե Կիևը հասունանա, այդ ժամանակ էլ պահանջված կլինեն նրանց միջնորդական ջանքերը, ովքեր առաջարկում են դրանք:
Օրեր առաջ Մակրոնի հետ բանակցություններից հետո ԱՄՆ նախագահ Ջո Բայդենը հայտարարել էր, որ Պուտինի հետ բանակցություններ չի ծրագրում, բայց պատրաստ է դրան, եթե Ռուսաստանը Ուկրաինայում իրավիճակի կարգավորման համար անհրաժեշտ քայլեր ձեռնարկի: