ԵՐԵՎԱՆ, 29 նոյեմբերի – Sputnik. Մոսկվան Վաշինգտոնին Ռազմավարական հարձակողական սպառազինությունների կրճատման (ՌՀՍԿ) պայմանագրի շուրջ հանդիպում անցկացնելու նոր ժամկետ կառաջարկի։ Այս հայտարարությունն արել է ՌԴ փոխարտգործնախարար Սերգեյ Ռյաբկովը։
«Ես ընդգծում եմ` սա չեղարկում չէ, այլ հետաձգում։ Մենք որոշ ժամանակ անց ամերիկացիներին նոր ժամկետ կառաջարկենք։ Բայց դա շատ շուտ չի լինի»,- ասել է Ռյաբկովը լրագրողներին։
Ռուս դիվանագետը կասկածում է, որ հանդիպումը կկայանա մինչև տարեվերջ:
«Մինչև տարեվերջ դժվար թե, մենք շեշտը չենք դնում տարեվերջի վրա։ Եվ հիմա դեռ վաղ է ասել, թե ինչպես և երբ ենք մենք ներկայացնելու այդ նոր առաջարկները և որ ժամանակահատվածի վրա ենք կենտրոնանալու»,- նշել է փոխնախարարը։
Սերգեյ Ռյաբկովը նաև ասել է, որ Մոսկվան այլ ընտրություն չուներ, քան Կահիրեում ՌՀՍԿ-ի պայմանագրի շուրջ հանդիպումը հետաձգելը:
«Մեծ հաշվով իրավիճակն այնպես էր դասավորվել, որ մենք այլ ընտրություն չունեինք։ Որոշումը կայացվել է քաղաքական մակարդակով»,- լրագրողներին ասել է Ռյաբկովը։
Նա նշել է, որ ամերիկացի գործընկերները մի շարք ուղղություններով չեն ցանկացել ընկալել Մոսկվայի ազդակները։
ՌՀՍԿ պայմանագրի հարցերով երկկողմ խորհրդատվական հանձնաժողովի նիստը պետք է տեղի ունենար Կահիրեում նոյեմբերի 29-ից դեկտեմբերի 6-ը։ Ավելի վաղ Ռուսաստանի ԱԳՆ-ն հայտնել էր, որ նոյեմբերի 29-ից դեկտեմբերի 6-ը Կահիրեում կայանալիք երկկողմ հանձնաժողովի նիստը հետաձգվում է և կանցկացվի ավելի ուշ։