ԵՐԵՎԱՆ, 28 նոյեմբերի – Sputnik. Հայաստանը նախօրեին ստացել է Ադրբեջանի պատասխանը` խաղաղության պայմանագրի նախագծի վերաբերյալ Հայաստանի ներկայացրած առաջարկներին։ «Արմենպրեսի» հետ հարցազրույցում հայտնել է ՀՀ արտգործնախարար Արարատ Միրզոյանը։
«Մենք Ադրբեջանին ենք ներկայացրել մեր առաջարկները հարաբերությունների կարգավորման կամ խաղաղության պայմանագրի նախագծի վերաբերյալ և նախօրեին ենք միայն ստացել նրանց պատասխանները: Այսպիսով՝ քննարկումները շարունակվում են»,– գործակալության հետ զրույցում ասել է ՀՀ արտաքին քաղաքական գերատեսչության ղեկավարը։
Նա հույս է հայտնել, որ այս հարցում հնարավոր կլինի համաձայնության հասնել հնարավորինս շուտ։ Նախարարն ընդգծել է, որ այս գործընթացում կարևոր դերակատարություն կարող են ունենալ նաև միջազգային գործընկերների միջնորդական ջանքերը։
Հիշեցնենք՝ վարչապետ Նիկոլ Փաշինյանը նոյեմբերի 16-ին ԱԺ-ում կառավարության հետ հարցուպատասխանի ժամանակ ասել էր, որ նոյեմբերի 7-ին Վաշինգտոնում խաղաղության պայմանագրին վերաբերող տեքստ է փոխանցվել ադրբեջանական կողմին, սպասում են Ադրբեջանի արձագանքին։