ԵՐԵՎԱՆ, 27 նոյեմբերի – Sputnik. Մոսկվայի «Սպարտակի» ու Սանկտ Պետերբուրգի «Զենիթի» միջև ֆուտբոլի Ռուսաստանի Գավաթի խմբային փուլի վերջին տուրի խաղի ավարտին զանգվածային ծեծկռտուք է տեղի ունեցել:
Ծեծկռտուքը սկսվել է Սանկտ Պետերբուրգում կայացած հանդիպման հիմնական ժամանակի վերջում, երբ հաշիվը 0:0 էր, Վիլմար Բարիոսի («Զենիթ») ու Քվինսի Պրոմեսի («Սպարտակ») միջև խաղային դրվագից հետո: Այնուհետև ծեծկռտուքի մեջ են մտել Շամար Նիկոլսոնը («Սպարտակ») ու Ռոդրիգոն («Զենիթ»)։
«Կապտասպիտակաերկնագույնների» պաշտպանը ոտքով հարվածել է «կարմրասպիտակների» հարձակվողին, վերջինս պատասխանել է Ռոդրիգոյի դեմքին հարվածով։ Դրանից հետո խաղադաշտ են մտել պահեստայինները, մրցավարները, երկու թիմերի մարզչական շտաբի անդամներն ու անվտանգության աշխատակիցները։ Հանդիպման գլխավոր մրցավար Վլադիմիր Մոսկալյովն այդ ժամանակ փորձում էր բաժանել մասնակիցներին։
Միջադեպի պատճառով կարմիր քարտեր են ստացել վեց խաղացող՝ Մալքոմը, Ռոդրիգոն, Բարիոսը «Զենիթից», ինչպես նաև Ալեքսանդր Սելիխովը, Ալեքսանդր Սոբոլևը և Պրոմեսը՝ «Սպարտակից»: