ԵՐԵՎԱՆ, 26 նոյեմբերի – Sputnik. ՀՀ մարդու իրավունքների պաշտպանը Քրիստինե Գրիգորյանը ՀՀ ոստիկանությունից պարզաբանումներ է պահանջել Լոռու մարզում ոստիկանության ծառայողների և քաղաքացիների մասնակցությամբ տեղի ունեցած միջադեպի վերաբերյալ։ Տեղեկությունը հայտնում է ՀՀ ՄԻՊ գրասենյակը։
ԱԺ «Հայաստան» խմբակցության պատգամավոր Քրիստինե Վարդանյանն այսօր ֆեյսբուքյան իր էջում գրել է, թե ահազանգ է ստացել, որ ՀՀ վարչապետ Նիկոլ Փաշինյանի ավտոշարասյան համար ճանապարհ բացող պարեկները դաժան ծեծի են ենթարկել մի խումբ քաղաքացիների, նրանցից ոմանք կոտրվածքներ են ստացել։ Պարեկային ծառայության աշխատակիցները, ըստ ահազանգի, նաև արցունքաբեր գազ են կիրառել, իսկ միջադեպը տեսագրած տեսախցիկների նյութերը ոչնչացվել են։
Ոստիկանությունից ՄԻՊ–ին հայտնել են, որ դեպքի կապակցությամբ նախաձեռնվել է քրեական վարույթ, և հավաստիացրել են, որ ծառայողներին ամրակցված տեսանկարահանող սարքերով արված տեսանյութերը պահպանվել են։
Պաշտպանը հաջորդիվ քրեական վարույթի վերաբերյալ պարզաբանումներ է պահանջելու նաև քրեական հետապնդման մարմիններից և իր ուշադրության կենտրոնում է պահելու քրեական վարույթի ընթացքը՝ բազմակողմանի, լրիվ և օբյեկտիվ քննության ապահովման նպատակով։