ԵՐԵՎԱՆ, 18 նոյեմբերի – Sputnik. Ֆինլանդիայի կառավարությունն առաջարկում է 139 միլիոն եվրո հատկացնել Ռուսաստանի հետ սահմանի երկայնքով պարիսպ կառուցելու համար։ Տեղեկությունը հայտնում է «Ռոյթերս» գործակալությունը։
Նախագծի համաձայն՝ կպարսպապատվի սահմանի 10-20 տոկոսը կամ 130-260 կմ-ը, իսկ շինարարությունը մինչև չորս տարի կտևի։ Սահմանապահ ծառայությունը կարծում է, որ պարիսպը կնվազեցնի սահմանն ապօրինի հատելու ռիսկը։
Լրատվամիջոցը հիշեցնում է, որ երկրների միջև ցամաքային սահմանի երկարությունը մոտ 1,3 հազար կմ է, իսկ իշխանությունը նախագծի քննարկումները սկսել է Ուկրաինայում ՌԴ հատուկ գործողության մեկնարկից անմիջապես հետո:
Նշենք, որ Ֆինլանդիայի սահմանապահ ծառայությունը Ռուսաստանի հետ սահմանի հարավարևելյան հատվածը պարսպապատելու առաջարկն արել էր սեպտեմբերին։ Պարիսպը մի քանի մետր բարձրություն կունենա, վերևում փշալարերով պատնեշ կլինի: Բացի այդ, ամբողջ տարածքը կհսկվի տեխնիկական միջոցներով։