Բելառուս-Հայաստան. տուրիզմի զարգացման նախադրյալներն ու խնդիրները

ԵՐԵՎԱն, 18 նոյեմբերի, Sputnik - Արմենուհի Մխոյան. Հայաստանը օտարերկրացիների համար առավել ճանաչելի դարձնելու նպատակով ՀՀ էկոնոմիկայի նախարարության զբոսաշրջության կոմիտեն իրականացնում է ճանաչողական այցեր: Նոյեմբերի 10-20 ընկած ժամանակահատվածում ճանաչողական այցի շրջանակներում Հայաստան են ժամանել Բելառուսի ԶԼՄ և զբոսաշրջային ոլորտի ներկայացուցիչներ։

Նշենք, որ այս տարվա 9 ամիսների ընթացքում, ըստ վիճակագրության, Բելառուսից Հայաստան է ժամանել ավելի քան 13 հազար մարդ: Եթե համեմատելու լինենք Հայաստանի տուրիզմի համար ամենաբարենպաստ՝ 2019 թվականի հետ, այս տվյալը 4 հազարով ավելին է: Մինչև տարեվերջ այդ թիվն, անշուշտ, կավելանա: Սակայն նույնիսկ այս աճը հաշվի առնելով, չենք կարող ասել, որ Բելառուսից Հայաստան զբոսաշրջիկների մեծ հոսք կա, չնայած նրան, որ երկու երկրների միջև գործում է առանց վիզային ռեժիմ, կան նաև ուղիղ չվերթներ։ Փորձագետները նշում են՝ գլխավոր պատճառը անբավարար իրազեկվածությունն է։

Այդ հարցը լուծելու նպատակով հանրապետության տարբեր մարզերի տեսարժան վայրեր այցեր կազմակերպելուց բացի, հայաստանյան և բելառուսական զբոսաշրջային օպերատորների համար կազմակերպվել էր հանդիպում, ինչը գործընկերային կապերի հաստատման և համատեղ նախագծերի քննարկման հնարավորություն է։

«Ուրախ ենք, որ այս նախաձեռնության շրջանակներում Հայաստանի և Բելառուսի տուրօպերատորները համախմբվել են՝ հնարավորություն ունենալով ծանոթանալու միմյանց հնարավորությունների հետ: Հայաստանը հրաշալի երկիր է՝ հյուսիսից հարավ՝ էկո, գաստրո, էքստրիմ և տուրիզմի այլ տեսակները ներկայացնող: Կարծում եմ այն, ինչ տեսաք, վերադառնալով Բելառուս՝ կպատմեք ձեր պոտենցիալ հաճախորդներին: Վստահեցնում եմ՝ Հայաստանը հրաշալի է տարվա բոլոր եղանակներին»,-ողջունելով Բելառուսից եկած հյուրերին նշեց ՀՀ-ում Բելառուսի Հանրապետության դեսպանի ավագ խորհրդական Սերգեյ Տրոցյուկը՝ հիշեցնելով, որ անցած տարի էլ ճանաչողական այցով Բելառուսում էին հայ տուրօպերատորները:

Գործընկերներին Հայաստանը ներկայացնող15 կազմակերպությունների թվում էր նաև Go To Armenia ընկերության մարքետինգային տնօրեն Դարյա Օսիպովան, որն իր փորձով է ապացուցում՝ Հայաստանը չսիրել հնարավոր չէ. ՌԴ-ից եկավ, տեսավ ու ամուսնու հետ մարտ ամսից բնակություն հաստատեց Հայաստանում:

«Մեզ համար Հայաստանը նախևառաջ մարդիկ են՝ հենց նրանք այնպես կանեն, որ դուք սիրահարվեք այս երկրին, դրա համար էլ ամեն մի մարզում գտնում ենք մարդկանց, ովքեր ավելի լավ են ներկայացնում իրենց երկիրն ու նրա հնարավորությունները ու ստիպում, որ դու նորից ու նորից գաս Հայաստան»,-Sputnik Արմենիայի հետ ունեցած զրույցի ժամանակ ասում է Դարյան հավելելով, որ նմանատիպ համագործակցության օրինակներ ունեն Դիլիջանում, իսկ հաջորդ տարվա համար անակնկալները շատ են:

Սերգեյ Բուկասը, որը ներկայացնում է բելառուսական Sakub տուրիստական ընկերությունը և ավելի քան 200 տուրիստական ընկերություններ ու անհատների համախմբող ասոցիացիան, վստահեցնում է ՝ առաջին այցը միակը չի լինի՝ Հայաստան կվերադառնա ավելի մեծ խմբով: «Մեր համար Հայաստանը նոր շուկա չէ, բայց դեռ ամբողջովին բացահայտված էլ չէ: Հաշվի առնելով այն, որ կա ուղիղ չվերթ, կարծում եմ՝ կարելի է խորացնել կապերը: Հայաստանում զարգացած են տուրիզմի տարբեր տեսակներ, հրաշալի հնարավորություններ կան զբոսաշրջիկի համար՝ պետք է ինֆորմացիան պարզապես թիրախին հասցնել»,-նշում է Սերգեյ Բուկասը:

Խոսելով Հայաստանից Բելառուս տուրիստական հոսքերի մասին՝ PEGAS ընկերության գլխավոր մենեջեր Միխայիլ Ասրյանը նշեց՝ հիմնականում շուկայի ոչ լավ ուսումնասիրության հետ է կապված:

«Անշուշտ, այս պահին Հայաստանից հոսքը այնպիսին չէ, ինչպես սպասվում է, իմ կարծիքով դա Բելառուսի հնարավորությունների իրազեկման պակասից է, մինչդեռ Բելառուսը կարող է առողջարանային պայմաններ առաջարկել՝ ունի հրաշալի բնություն ու հրաշալի բարի ժողովուրդ»,-ասում է նա ու հավելում, որ երկկողմանի տուրիզմը կզարգանա, եթե ընկերությունները գրավիչ ու հետաքրքիր փաթեթներ առաջարկեն, իսկ ուղիղ չվերթներն ու առանց վիզային ռեժիմը նպաստավոր պայման է դրա համար: