ՀՀ կառավարության կողմից հավանության արժանացած օրինագծի ընդունման դեպքում խանութներն ու սուպերմարկետները, որոնք վերավաճառքի նպատակով ապրանքներ են ձեռք բերում տեղի արտադրողներից, այլևս նպատակահարմար չեն գտնելու աշխատել միկրոձեռնարկատերերից, և վերջիններս կանգնելու են փակման վտանգի առաջ։ Sputnik Արմենիայի հետ զրույցում նման կարծիք հայտնեց Աուդիտորների պալատի նախագահ, տնտեսագետ Նաիրի Սարգսյանը։
Նշենք` կառավարությունը հավանություն է տվել մի նախագծի, որի ընդունման դեպքում միկրոձեռնարկատիրության հարկման համակարգում գործունեություն իրականացնող տնտեսվարողները զրկվելու են առկա արտոնություններից:
«Աշխարհի որևէ երկրում չեք տեսնի, որ առևտրին տան չհարկվելու արտոնություն, իսկ արտադրությանը` ոչ։ Արտադրությունը մեզանում կարող է մեծածախ վաճառք իրականացնել` աշխատելով միկրոձառնարկատիրության համակարգում, մինչդեռ հիմա այդ ճյուղը կտրում են։ Եթե դուք, դիցուք, կոշիկ եք արտադրում և հաշիվ գրում կոշիկ վերավաճառող որևէ խանութի, ապա ձեր տված փաստաթուղթն այլևս ծախս չի ճանաչվելու, բայց Հայաստան ներմուծված կոշիկի փաստաթուղթը ծախս է ճանաչվելու, հետևաբար` այս օրինագծով օժանդակում են ներմուծվող ապրանքների վաճառքը»,–պարզաբանեց տնտեսագետը։
Ըստ նրա` ՀՀ օրենսդրությունը, հատկապես հարկային իրավակարգավորումները, պետք է ուղղված լինեն տեղական արտադրության զարգացմանը։ Հարկային արտոնություններից զատ` պետությունը պետք է նաև ժամանակ առ ժամանակ օժանդակություն տրամադրի հասցեական ոլորտներին` խթանելով հայրենական արտադրությունը։
Մեր զրուցակցի բոնորոշմամբ` տվյալ գործառույթն առավել հրատապ է դառնում հայ–թուրքական սահմանի բացման ֆոնին։ Երբ հայկական կողմը բանակցում է ու քաղաքական որոշում հասունացնում բաց սահմաններ ունենալու վերաբերյալ, ապա այդ դեպքում հայրենական արտադրողները պետք է առավել քան պաշտպանված լինեն, որպեսզի թուքական ապրանքները չողողեն հայկական շուկան ու չփակվեն տեղական արտադրությունները։
Սարգսյանը տեղեկացրեց, որ իրենք մոտ մեկ ամիս առաջ դիմել էին ՀՀ ֆինանսների նախարարությանն ու ՀՀ ԱԺ տնտեսական հարցերի մշտական հանձնաժողովին` ներկայացնելով իրենց մտահոգությունները, և հավելեց, որ այսօր ֆինանսների նախարարությունից ստացել են պատասխան իրենց առաջարկները մերժելու վերաբերյալ։ Նա պնդեց, որ իրենք կտան շատ կոշտ պատասխան` փորձելով խորհրդարանում ազդել օրինագծի ընդունման գործընթացի վրա։
Նշենք, որ վերոհիշյալ վիճահարույց նախագիծը պետք է քննարկվի նաև Ազգային ժողովում` համապատասխան ընթացակարգով։
Հիշեցնենք` գործող օրենսդրությամբ միկրոձեռնարկատիրության հարկման համակարգում մինչև 24 մլն դրամ շրջանառություն ունեցող կազմակերպությունները՝ ծառայություն մատուցողները, առևտրով զբաղվողները, արտադրությունները, իրավունք ունեն աշխատելու այդ համակարգում և հարկեր չվճարելու, իսկ նոր նախագծի համաձայն` հատկապես արտադրությունները, որոնք պետք է զբաղվեն մեծածախ գործունեությամբ, իրավունք չունեն լինել միկրոձեռնարկատիրության համակարգում։