ԵՐԵՎԱՆ, 16 նոյեմբերի – Sputnik. Վաշինգտոնում ադրբեջանական կողմին ենք փոխանցել խաղաղության պայմանագրին վերաբերող մեր տեքստը։ ԱԺ-ում կառավարության հետ հարցուպատասխանի ժամանակ ասաց վարչապետ Նիկոլ Փաշինյանը։
«Այժմ սպասում ենք Ադրբեջանի արձագանքներին։ Սակայն տեսնում ենք նաև լարվածության որոշակի միտումներ, ինչը կապվածէ որոշակի դեպքերի հետ։ Հարցն այն է, որ միջազգային հանրությունը պաշտպանում է մեր այն տեսակետը, որ Ադրբեջանի զորքերը պետք է դուրս գան ՀՀ տարածքից, և հույս ունենք, որ ՀԱՊԿ–ը նույնպես կպաշտպանի այդ դիրքորոշումը։ Իհարկե, պետք է տարօրինակը լիներ` ՀԱՊԿ–ը պետք է նախ պաշտպաներ մեր դիրքորոշումը»,–ասաց Փաշինյանը։
Նրա խոսքով` նոյեմբերի 23-ին Երևանում կայանալիք ՀԱՊԿ գագաթաժողովին այս կոնսենսուսը կարձանագրեն։ Փաշինյանը հավելեց` չեն ուզում ՀԱՊԿ-Ադրբեջան պատերազմ հրահրել, բայց կարևոր է, որ ՀԱՊԿ-ը հստակ քաղաքական գնահատական տա իրավիճակին, Ադրբեջանի իրականացրած օկուպացիային։
Հիշեցնենք` նոյեմբերի 10–ին ՀՀ կառավարության նիստում Փաշինյանը հայտարարեց, որ հոկտեմբերի 31-ին Սոչիում Ադրբեջանի նախագահ Իլհամ Ալիևին առաջարկել է ԼՂ–ի շուրջ ստեղծել ապառազմականացված գոտի` միջազգային երաշխիքներով, որի արդյունքում ԼՂ–ն պաշտպանության բանակ ունենալու կարիք չի ունենա։
Ապառազմականացման առաջարկ Հայաստանն արել է նաև ՀՀ–Ադրբեջան սահմանի մասին` առաջարկելով զորքերը հետ քաշել 1991թ–ին հաստատված սահմանից ու ստեղծել 3կմ–անոց ապառազմականացված գոտի։ Փաշինյանի խոսքով` հոկտեմբերի 31-ին Ադրբեջանին է փոխանցվել նաև այս առաջարկի նորացված տարբերակը։