ԵՐԵՎԱՆ, 16 նոյեմբերի – Sputnik. Ազդակներ կան, որ գուցե այդքան էլ իրատեսական չէ, որ խաղաղության պայմանագրի ստորագրման պահին դելիմիտացիան ավարտված լինի։ Կառավարության հետ հարցուպատասխանի ժամանակ այս մասին ասաց ՀՀ վարչապետ Նիկոլ Փաշինյանը։
«Մենք հույս ունեինք և կար ըմբռնում, որ խաղաղության պայմանագրի ստորագրման կամ ուժի մեջ մտնելու պահին սահմանների դելիմիտացիան ավարտված կլիներ։ Հիմա ազդակներ կան, որ գուցե դա այդքան էլ իրատեսական չէ»,–ասաց Փաշինյանը։
Նրա խոսքով` այստեղ լուծում կա` զորքերի հետքաշման եղանակով 1990-ին գոյություն ունեցած սահմանագիծը հիմք ընդունել և զորքերը հետ քաշել սահմանից, իսկ սահմանը հսկելու գործառույթը հանձնել սահմանապահներին։
Նշենք, որ նոյեմբերի 11–ին Հանրային հեռուստաընկերությանը տված հարցազրույցում Փաշինյանն ասել էր, որ Հայաստանն ամեն ինչ կանի, որ մինչև տարեվերջ Ադրբեջանի հետ խաղաղության պայմանագիր կնքվի։ Նա ընդգծել էր, որ խաղաղության պայմանագրի ուժի մեջ մտնելուց առաջ առնվազն դելիմիտացիայի գործընթացը պետք է ավարտված լինի։
Փաշինյանի խոսքով`դա անհրաժեշտություն է, քանի որ մի կողմից հայտարարվում է, որ փոխադարձաբար ճանաչում ենք տարածքային ամբողջականությունը, մյուս կողմից Ադրբեջանը հայտարարում է, որ Հայաստանից տարածքներ չի օկուպացրել և իրենք այնտեղ են, որտեղ իրենց սահմանն է։