ԵՐԵՎԱՆ, 16 նոյեմբերի – Sputnik. Իրանի Թեհրան նահանգում հեղափոխական դատարանը այսօր անկարգությունների երեք մասնակցի մահապատժի է դատապարտել։ Այս մասին հաղորդում է ՌԻԱ Նովոստին` հղում անելով Mehr գործակալությանը։
«Անկարգությունների մասնակիցների և անվտանգությունը խաթարողների նկատմամբ դատավարությունից և նրանց փաստաբանների ներկայությամբ դատական լսումներից հետո Թեհրանի հեղափոխական դատարանում նախնական դատավճիռ է կայացվել անկարգությունների ևս երեք մասնակիցների նկատմամբ», – ասվում է հաղորդագրության մեջ։
Գործակալությունը նշում է, որ մասնակիցներից մեկը դատավճռով մեղադրվում է հասարակական կարգը խախտելու և երկրում անկայունություն մտցնելու, ինչպես նաև մարդկանց և պետական գույքին վնաս պատճառելու համար։
Բացի այդ, Թեհրանի հեղափոխական դատարանի կողմից տրված մեկ այլ փաստաթղթի համաձայն, երկրորդ մեղադրյալը մահապատժի է դատապարտվել Պակդաշտում ոստիկանական բաժանմունքը հրդեհելու, գույքը ոչնչացնելու համար։ Մահապատժի դատապարտված երրորդ անձը, ըստ դատարանի վճռի, վնաս է հասցրել պետական սեփականությանն ու գլխավոր դերակատարում է ունեցել անկարգություններում։
Ավելի վաղ իրանական ԶԼՄ–ները հայտնել էին, որ նոյեմբերի սկզբին հեղափոխական դատարանները մահապատիժների վերաբերյալ առաջին վճիռներն են կայացրել երկու իրանցու նկատմամբ՝ անկարգություններ կազմակերպելու համար։
Սեպտեմբերի կեսերից Իրանում շարունակվում են անկարգությունները, որոնք սկսվել են Մահսա Ամինիի մահից հետո։ Աղջիկը մահացել էր բարքերի ոստիկանության կողմից ձերբակալվելուց հետո։ Բողոքի ցույցեր ու անկարգություններ են անցկացվել Գիլան, Խուզեստան, Բելուջիստան և Սիստան նահանգներում, Թեհրանում և Քրդստանում։