ԵՐԵՎԱՆ, 16 նոյեմբերի – Sputnik. Հայաստանը կհաղթահարի պետական պարտքի պարտավորությունների սպասարկումը, ֆինանսական պարտավորությունների կատարումը հետաձգելու համար Արժույթի միջազգային հիմնադրամին դիմելու պատճառ չկա։ Այս մասին խորհրդարանում հայտարարեց Ֆինանսաների նախարար Տիգրան Խաչատրյանը՝ 2023 թ. բյուջեի քննարկման ժամանակ։
Նշենք, որ Արժույթի միջազգային հիմնադրամն իր վերջին զեկույցում համաշխարհային տնտեսության համար կանխատեսել է ընդամենը 2.6 տոկոս աճ։
«Մենք չենք տեսնում որևէ պատճառ, թե ինչու պետք է դիմենք միջազգային ֆինանսական կառույցներին` մեր պարտքային պարտավորությունները սպասարկելու պայմանները մեղմելու համար։ Մեր բոլոր հաշվարկները ցույց են տալիս, որ գտնվում ենք բավականին հուսալի միջակայքում, և մեր քաղաքականությունը թույլ է տալիս մեր ստանձնած պարտավորությունները կատարել ժամանակին և ամբողջությամբ։ Դա մեր պլանների մեջ չի մտնում»,– ասաց նա։
Ավելի վաղ Խաչատրյանը շեշտել էր, որ դրամի արժևորումից հետո շատ ավելի է հեշտացել արտարժույթով արտահայտված պարտքերի վճարումը, իսկ պարտքի ընդհանուր զամբյուղում դրանք տարեսկզբին կազմել են մոտ 70%։ Այժմ դրանց տեսակարար կշիռն արդեն 63%–ից պակաս է։ Արդյունքում, ինչպես սպասվում է ֆինանսների նախարարությունում, մինչև տարեվերջ պարտքը կկրճատվի մինչև 50%։