ԵՐԵՎԱՆ, 15 նոյեմբերի – Sputnik. Աշխատանքի և սոցիալական հարցերի նախարարությունն ուզում է անկանխիկի տրամաբանությունը տարածել նաև ընտանեկան և սոցիալական նպաստի վրա։ ԱԺ հերթական քառօրյայի ժամանակ այս մասին հայտնեց ՀՀ աշխատանքի և սոցիալական հարցերի փոխնախարար Դավիթ Խաչատրյանը` ներկայացնելով «Պետական նպաստների մասին» օրենքում նախատեսված փոփոխությունները։
«Առաջարկում ենք ընտանեկան և սոցիալական նպաստի, ինչպես նաև հրատապ նպաստի վճարումը դարձնել անկանխիկ` 2023-ի հունվարի 1-ից քաղաքներում և 1000-ից ավելի բնակչություն ունեցող գյուղական բնակավայրերում, իսկ 2024-ից` 1000-ից պակաս բնակչություն ունեցող վայրերում»,–ասաց Խաչատրյանը։
Նրա խոսքով` նախագծի ընդունմամբ կնվազեն պետբյուջեի ծախսերը, քանի որ բանկերի միջոցով անկանխիկ վճարումների դեպքում ծառայության գումար չի նախատեսվում։
Փոխնախարարը հայտնեց, որ հոկտեմբերի տվյալներով` անկանխիկ գործարքները թոշակների քարտերով 1.8 մլրդ դրամի է հասել։
Նշենք, որ «Պետական կենսաթոշակների մասին» օրենքի համաձայն` 2022 թ.-ի հունվարի 1-ից կենսաթոշակները վճարվում են բացառապես անկանխիկ եղանակով՝ բանկի միջոցով։
Բացառություն են կազմում առաջին կամ երկրորդ խմբի հաշմանդամություն ունեցող, 75 տարին լրացած կամ 14 տարին լրացած անչափահաս անձինք, որոնք իրենց ընտրությամբ կենսաթոշակը կարող են ստանալ նաև կանխիկ եղանակով՝ «ՀայՓոստի» միջոցով: