ԵՐԵՎԱՆ, 15 նոյեմբերի – Sputnik․ Այսօր վանդալիզմի դեպքեր են գրանցվել Երևանում։ Անհայտ անձինք գրառումներ են արել ռազմական և պետական գործիչ Գարեգին Նժդեհի արձանի ու Արգենտինայի ազգային հերոս, փաստաբան, քաղաքական գործիչ Մանուել Բելգրանոյի կիսանդրու պատվանդանների վրա։ Այս մասին ֆեյսբուքյան իր էջում ահազանգել է հաղորդավար, արևելագետ Աբրահամ Գասպարյանը։
«Երկրի ներսում թշնամու օրակարգերն սպասարկողների պակաս չկա։ Նժդեհը պատահական թիրախ չի դարձել, գրությունն էլ՝ ֆարսիով թարգմանաբար՝ «Մահ Խամենեիին», չի տեղավորվում հայության ու Հայաստանի ազգային-պետական գաղափարախոսության, շահերի ու արժեքների համատեքստում, դեռ չեմ խոսում մեծ առաջնորդի հիշատակի նկատմամբ նողկալի ու թշնամական սրբապղծության մասին»,- գրել է Գասպարյանը։
Նա դիմել է ՀՀ ոստիկանությանը՝ պահանջելով վայրկյան առաջ հայտնաբերել հանցանքի հեղինակին ու ամենախիստ պատիժ սահմանել նրա համար։
Ըստ Գասպարյանի՝ սա պետության ու ազգի երեսին թքելու քայլ է, աշխարհաքաղաքական վտանգավոր արարք, որն ավելի վատ գալիքի նախերգանք է։
Ավելի ուշ նա թարմացրել է գրառումը` նշելով, որ ոստիկանությունն օպերատիվ արձագանքել է և խմբեր ուղարկել դեպքի վայր։
Հիշեցնենք` Նժդեհի արձանը գտնվում է մետրոյի «Հանրապետության հրապարակ» կայարանի հարևանությամբ, իսկ Բելգրանոյի կիսանդրին` Արգենտինայի հրապարակում։