ԵՐԵՎԱՆ, 15 նոյեմբերի – Sputnik. ԱԺ հերթական քառօրյա նիստին ներկա են նաև ընդդիմադիր պատգամավորները։
«Մենք այստեղ ենք, և դուք ստիպված եք համակերպվել այս փաստի հետ։ Սա ՀՀ Ազգային ժողովն է, նաև մեր ու մեզ այստեղ գործուղած քաղաքացիների ԱԺ–ն։ Այն ձեր սեփականությունը չէ։ Երկար ժամանակ բոյկոտում էինք նիստերը, քանի որ փողոցում էինք պայքարում այս իշխանության կործանարար քաղաքականության դեմ։ Հիմա փողոցում ժամանակավոր դադար է, և մենք լիարժեք օգտագործելու ենք մեր գործիքակազմը»,-ասաց «Հայաստան» խմբակցության պատգամավոր Աղվան Վարդանյանը։
Նա նշեց, որ ԱԺ են եկել իրենց օրակարգով` Հայաստանի ու Արցախի` ՀՀ քաղաքացիներին հուզող հարցերով։ Վարդանյանը ընդգծեց` այս իշխանության օրոք ՀՀ–ն ապագա չունի, ապագա չունի նաև հայ ժողովուրդը։ Իրենք Ազգային ժողով են եկել, որպեսզի թույլ չտան կործանարար ընթացքն անշրջելի դառնա։
Հիշեցնենք, որ 2022թ.–ի ապրիլից ԱԺ ընդդիմադիր խմբակցությունները բոյկոտել էին խորհրդարանի նիստերը։ Տևական ժամանակ նրանք բողոքի ակցիաներ էին իրականացնում` պահանջելով վարչապետ Նիկոլ Փաշինյանի հրաժարականը։
Հոկտեմբերի 25–ին «Հայաստան» դաշինքին որոշ պատգամավորներ մասնակցեցին ԱԺ նիստին։ Նրանք այնտեղ էին մամուլում շրջանառվող խաղաղության պայմանագրի տարբերակի մասին հարցադրումներ անելու համար։