ԵՐԵՎԱՆ, 14 նոյեմբերի – Sputnik. Սեպտեմբերյան ագրեսիայից հետո նոր ձևավորված առաջնագծի հատվածում ինժեներական աշխատանքները շարունակվում են, առաջին անհրաժեշտ ինժեներատեխնիկական լուծումներն ավարտվել են։ Ազգային ժողովում լրագրողների հետ զրույցում հայտնեց պաշտպանության և անվտանգության հարցերի մշտական հանձնաժողովի նախագահի տեղակալ Արմեն Խաչատրյանը։
«Ինժեներական աշխատանքները բավականին ակտիվ ընթացի մեջ են։ Ավելին` որոշ հատվածներում դրանք արդեն իսկ ավարտվել են։ Չնայած ինժեներական աշխատանքն այնպիսի բան է, որ սկսվում և երբեք չի ավարտվում` նոր պայմաններ են ի հայտ գալիս և այլն։ Սակայն առաջնահերթ աշխատանքները շատ վայրերում արված են»,–ասաց Խաչատրյանը։
Նրա խոսքով` առաջնային աշխատանքների ավարտից հետո կսկսվի աշխատանքների հաջորդ փուլը` երկաթբետոնյա պատնեշների կառուցման, ինժեներատեխնիկական լուծումների շրջանը։
Խաչատրյանը շեշտեց` այս պահին առաջնագիծը կահավորելը որևէ կերպ պայմանավորված չէ հետագա սահմանների գծման հեռանկարների հետ, այլ պայմանավորված է կոնկրետ այս պահին պաշտպանունակությունը բարձրացնելով։ Նա նշեց` պետք է պատրաստ լինեն բոլոր առումներով, քանի որ ցանկացած սցենար կարող է լինել։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։