Երևան-Միներալնիե Վոդի-Երևան երթուղով կանոնավոր ուղիղ չվերթերի մեկնարկը տրված է

ԵՐԵՎԱՆ, 14 նոյեմբերի – Sputnik. Այսօր կայացել է Երևան-Միներալնիե Վոդի-Երևան երթուղով առաջին ուղիղ թռիչքը։ Տեղեկությունը հայտնում է «FlyOne Armenia» ավիաընկերությունը։

Թռիչքն իրականացվել է «Զվարթնոց» միջազգային օդանավակայանից դեպի Միներալնիե Վոդիի Միխայիլ Լերմոնտովի անվան միջազգային օդանավակայան:

Չվերթերն իրականացվելու են շաբաթական 3 անգամ` երկուշաբթի, չորեքշաբթի, և շաբաթ օրերին։

Նշվում է, որ «FlyOne Armenia»–ի թռիչքային քարտեզում Միներալնիե Վոդին Ռուսաստանի Դաշնության հինգերորդ քաղաքն է:

Նշենք, որ ավիաընկերությունը հիմնադրվել է 2021 թվականին։ Հոկտեմբերի 27-ին ՀՀ Քաղաքացիական ավիացիայի կոմիտեն ավիաընկերությանը տրամադրել է օդանավ շահագործողի վկայական: «FlyOne Armenia»-ն թռիչքներ է իրականացնում մի շարք ուղղություններով` Մոսկվա, Սանկտ Պետերբուրգ, Սոչի, Եկատերինբուրգ, Փարիզ, Լիոն, Միլան, Քիշնև, Թբիլիսի և Ստամբուլ:

Ընկերության ավիապարկը բաղկացած է Airbus A320 և A319 ինքնաթիռներից։