ԵՐԵՎԱՆ, 14 նոյեմբերի – Sputnik. ՀՀ պաշտպանության նախարար Սուրեն Պապիկյանի կարծիքով ադրբեջանական գերությունից ազատված զինծառայողները չպետք է բանակից ազատվեն։ ԱԺ պաշտպանության և անվտանգության հարցերի մշտական հանձնաժողովի հերթական նիստից հետո լրագրողների հետ ճեպազրույցում Պապիկյանը նման հայտարարություն արեց։
Լրագրողներից մեկի այն հարցին, թե գերությունից վերադարձածները ծանր հոգեբանական վիճակում են, արդյոք հնարավոր չէ որևէ օրենսդրական փոփոխությամբ նրանց ազատել բանակից, Պապիկյանը բացասական արձագանքեց։
«Չեմ կարծում, որ գերությունից վերադարձածներին պետք է բանակից ազատել»,- ասաց նա։
Նշենք, որ Քննչական կոմիտեն սեպտեմբերի 30-ին հայտնեց, որ ադրբեջանական վերջին ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանը Հայաստանին վերադարձրեց 17 գերիների։