ԵՐԵՎԱՆ, 14 նոյեմբերի - Sputnik. Milur Electronics ԲԲԸ-ն («Միլանդր» ընկերության հայաստանյան մասնաճյուղը) հայտնվել է ԱՄՆ պատժամիջոցների տակ ռուսական ձեռնարկության հետ կապերի համար: Տեղեկությունը նշված է ԱՄՆ պետքարտուղար Էնթոնի Բլինկենի գրավոր հայտարարության մեջ։
Պետքարտուղարը հայտարարել է, որ ԱՄՆ-ն պատժամիջոցներ է սահմանել ռուսական «Միլանդր» միկրոսխեմաներ արտադրող ընկերության նկատմամբ: Նա հայտնում է, որ դա արվել է, քանի որ ընկերությունն աշխատում է կամ աշխատում էր էլեկտրոնիկայի արտադրության ռուսական տիրույթում։
««Միլանդրը» Մոսկվայի գիտահետազոտական և փորձարարա-կոնստրուկտորական աշխատանքների ռազմական կառույցի մի մասն է»,-ասել է Բլինկենը։
Նա հավելել է, որ նշված ընկերության հետ կապի համար պատժամիջոցների տակ են հայտնվել նաև Հայաստանում գործող Milur Electronics LLC ընկերությունը, շվեյցարական Milur SA-ն ու թայվանական Sharp Edge Engineering Inc-ը:
Ամերիկյան ֆինանսների նախարարության կայքում նշվում է, որ ԱՄՆ-ն պատժամիջոցների ցուցակում ընդգրկվել է 28 իրավաբանական եւ 14 ֆիզիկական անձանց: Նշվում է նաև, որ Հայաստանում գործող Milur Electronics-ը շվեյցարական MILUR SA ընկերության դուստր ձեռնարկությունն է։ Այն ստեղծվել է արտասահմանյան գործարաններում պատվերներ իրականացնելու, ինտեգրալային չիպեր արտադրելու և արտերկրում վաճառք իրականացնելու նպատակով: