ԵՐԵՎԱՆ, 12 նոյեմբերի – Sputnik. Թուրքիայի նախագահ Ռեջեփ Թայիփ Էրդողանը հայտարարել է, որ ակնկալում է առաջիկա երկու-երեք օրում բանակցություններ վարել ՌԴ նախագահ Վլադիմիր Պուտինի հետ:
«Ես հնարավորություն կունենամ իմանալու, թե ինչ է նա մտածում, ինչ քայլեր են նրանք ձեռնարկելու, հատկապես, թե ինչ քայլեր կարող են ձեռնարկել, որպեսզի այդ գործընթացը (ուկրաինական կարգավորման շուրջ` խմբ.) վերածվի խաղաղության»,- Ուզբեկստանից վերադառնալիս ասել Է Էրդողանը ինքնաթիռում:
Նա նշել է, որ մտադիր է բանակցել նաև Վլադիմիր Զելենսկու հետ, որպեսզի իմանա Մոսկվայի հետ բանակցությունների վերաբերյալ Կիևի դիրքորոշումը։
«Կտեսնենք, թե ինչ են մտածում, ինչպես են վերաբերվում Թուրքիայի միջնորդությանը և խաղաղ բանակցությունների հեռանկարին, կիմանանք նրանց կարծիքը։ Եվ մենք ուղիներ կփնտրենք, որպեսզի հասկանանք՝ արդյոք այդ միջնորդությունը մեզ խաղաղության կտանի, թե ոչ»,-ասել է Էրդողանը։
Նշենք, որ Թուրքիայի նախագահը Սամարղանդում մասնակցել է Թյուրքական պետությունների կազմակերպության անդամ երկրների ղեկավարների նիստին։